Prezident Serdar Berdimuhamedow Türkiýäniň Prezidenti Rejep Taýyp Ärdogana we Türkiýäniň doganlyk halkyna ýurduň milli baýramy — Respublika güni mynasybetli tüýs ýürekden gutlaglaryny, iň gowy arzuwlaryny iberdi.
“Ýurduňyzyň syýasy, ykdysady, durmuş ulgamlarynda gazanan üstünliklerini hem-de döwletlerimiziň arasynda emele gelen hyzmatdaşlygyň ýokary derejesini bellemek biziň üçin ýakymlydyr. Biz Türkmenistan bilen Türkiýe Respublikasynyň arasyndaky doganlyk gatnaşyklara ýokary baha berýäris we onuň geljekde iki ýurduň halklarynyň bähbitlerine has-da ösdüriljekdigine ynam bildirýäris” diýip, döwlet Baştutany gutlag hatynda nygtady.
Prezident Serdar Berdimuhamedow ýakymly mümkinçilikden peýdalanyp, Prezident Rejep Taýyp Ärdogana berk jan saglyk, bagtyýarlyk we jogapkärli döwlet işinde üstünlikleri, Türkiýäniň doganlyk halkyna bolsa parahatçylyk, abadançylyk, rowaçlyk arzuw etdi.
Türkiýede Respublika güni her ýylyň 29-njy oktýabrynda bellenilip geçilýär. Bu baýramçylyk Osmanly imperiýasy ýykylandan soň, 1923-nji ýylda Türkiýe Respublikasynyň yglan edilmegi mynasybetli baýram edilýär. Şol gün Mustafa Kemal Atatürk ýurduň ilkinji Prezidenti wezipesine saýlanyldy.
