Samsung kompaniýasy Galaxy XR garyşyk hakykat garniturasyny – Apple Vision Pro-nyň Android-e esaslanýan bäsdeşini hödürledi.
Garnitura Google we Qualcomm bilen hyzmatdaşlykda döredildi. Onuň bahasy 1800 dollar bolup, bu ýakynda hödürlenen M5 çipli Apple Vision Pro-dan ($3500) iki esse diýen ýaly arzandyr.
Garnitura Snapdragon XR2+ Gen 2 prosessory bilen enjamlaşdyryldy we Android XR platformasynda işleýär. Onda 3552×3840 piksel durulyk we 96% DCI-P3 reňk palitrasy bilen micro-OLED displeýi oturdyldy, bu hem şekiliň ýiti we aýdyň bolmagyny üpjün edýär.
Galaxy XR sekiz sany daşky kamera bilen üpjün edildi, olardan ikisi bilen 3D fotosuratlary we wideolary düşürip bolýar. Gurluş göz hereketini yzarlaýar we gözüň reňkli ýorkasy bilen gulpdan açmagy goldaýar, ony hereketiň, kontrolleriň, syçanjygyň ýa-da klawiaturanyň kömegi bilen dolandyryp bolýar.
Garnituranyň agramy 545 gram. Ol energiýany daşky akkumulýatordan alýar we bu 2,5 sagat işlemek üçin ýeterlikdir. Ulanyjylar 4K-da wirtual kinoteatrda filmlere tomaşa edip ýa-da 180° we 360° syn ediş burçy bilen VR kontentine aralaşyp biler.
Android XR platformasy Gemini emeli aň bilen birleşdirildi. Ol Circle to Search funksiýasy arkaly maglumat gözlemäge, Google Maps-de 3D görnüşde ugurlary gurmaga, YouTube, Google Meet, Chrome we beýleki programmalar bilen işlemäge kömek edýär.
Galaxy XR garniturasy NFL Pro Era we Inside Job oýunlary, şeýle-de Adobe Project Pulsar ýaly professional gurallar bilen gabat gelýär. Kontroller we gorag gutusy 250 dollardan aýratyn satylýar.
