21-nji oktýabrda Türkmenistanyň wise-premýeri, daşary işler ministri Raşid Meredow resmi saparynyň çäginde Gruziýanyň Prezidenti Mihail Kawelaşwili hem-de Premýer-ministr Irakli Kobaħidze bilen duşuşdy. Bu barada Türkmenistanyň Daşary işler ministrliginiň metbugat gullugy habar berdi.
Türkmenistanyň diplomaty Gruziýanyň döwlet we hökümet ýolbaşçylaryna Türkmenistanyň Prezidenti Serdar Berdimuhamedowdan hem-de Halk Maslahatynyň Başlygy Gurbanguly Berdimuhamedowdan mähirli salamyny we iň gowy arzuwlaryny ýetirdi.
Prezident Mihail Kawelaşwili bilen bolan duşuşykda ikitaraplaýyn hyzmatdaşlygyň esasy ugurlary, syýasy dialogy, ykdysady we medeni gatnaşyklaryň ösdürilmegi ara alnyp maslahatlaşyldy. Duşuşykda yzygiderli ýokary derejeli gatnaşyklaryň strategik hyzmatdaşlygy berkitmäge ýardam edýändigi nygtaldy. Şeýle hem Türkmenistan bilen Gruziýanyň halkara derejesinde, hususan-da, BMG-niň çäklerinde biri-biriniň başlangyçlaryny goldaýandygy bellenildi. Gruziýanyň Prezidenti Türkmenistanyň hemişelik bitaraplyk syýasatynyň dünýäde parahatçylygy we durnuklylygy saklamaga möhüm goşant goşýandygyny aýratyn belledi.
Premýer-ministr Irakli Kobaħidze Raşid Meredow bilen bolan duşuşygynda Türkmenistanyň Prezidentiniň gatnaşmagynda geçen gepleşikleriň netijeliligini belläp, olaryň özara hyzmatdaşlygy berkitmekde möhüm ähmiýete eýedigini nygtady.
Saparyň çäginde Türkmenistanyň daşary işler ministri Gruziýanyň daşary işler ministri Maka Boçorişwili we Parlamentiň başlygy Şalwa Papuaşwili bilen hem duşuşdy. Taraplar daşary syýasat edaralarynyň arasyndaky gatnaşyklaryň giňeldilmegi, parlamentara hyzmatdaşlygyň ösdürilmegi, şeýle hem ulag, söwda, bilim, ylym, sport we syýahatçylyk ugurlaryndaky täze mümkinçilikleri ara alyp maslahatlaşdylar.
