2026-njy ýylyň gyşky Olimpiýa oýunlarynyň açylyş dabarasy italýan moda älemindäki meşhur dizaýner Jiorjio Armaniniň hormatyna bagyşlanar diýip, WWD neşiri habar berýär.
Dabara 6-njy fewralda Milanda “San-Siro” stadionynda we şäheriň beýleki ýerlerinde geçiriler.
“Milano Kortina 2026” gaznasynyň prezidenti we dabarany guraýjylaryň biri Jowanni Malago bu kararyň “Milan we bütin Italiýa üçin dünýä belli moda ussadyny hatyralamak üçin aýratyn mümkinçilik” boljakdygyny belledi.
Dabaranyň jikme-jiklikleri häzirlikçe aýan edilmeýär, emma onuň uly göwrümli tomaşa boljakdygy mälim. Guramaçylar Olimpiýa alawynyň bu gezek bir wagtda iki ýerde ýakyljakdygyny aýtdylar — bu bolsa dabaranyň esasy aýratynlyklarynyň biri bolar.
Gyşky oýunlaryň ýaryşlary Demirgazyk Italiýanyň dürli sebitlerinde geçiriler.
Şeýle hem, WWD-niň ýazmagyna görä, Giorgio Armani brendi Italiýanyň milli ýygyndysynyň resmi eşik üpjün edijisi bolup durýar. Bu hyzmatdaşlyk Emporio Armani EA7 liniýasy bilen Italiýanyň Sportuň gyşky görnüşleri federasiýasynyň (FISI) arasyndaky hyzmatdaşlygyň çäklerinde amala aşyrylýar.
