19-njy oktýabrda irden Luwrda ogurlyk bolup geçdi. Ýedi minutda jenaýatkärler fransuz imperatorlarynyň dokuz sany gymmatly şaý-seplerini – bezeg önümleriniň toplumyny, gap-gaç toplumyny, monjugy, gulakhalkany, iki täji we gülýakany ogurlady diýip, Le Parisien habar berýär.
Hadysa ýerli wagt bilen 9:30 töweregi, muzeý açylandan tiz wagtdan soň bolup geçdi. Neşiriň maglumatlaryna görä, dört ogry iki sany TMax skuterinde Sena tarapdan binanyň ýanyna geldi. Gurluşyk awto-diňinden peýdalanyp, olar penjireleriň birine çykyp, ony ýylmaýjy gural bilen döwdi we Apollon galeýerasyna – fransuz monarhlaryň hazynalarynyň saklanýan zalyna girdi.
Häkimiýet entek ogurlanan zatlaryň sanawyny we olaryň bahasyny resmi taýdan hödürlemedi, ýöne Fransiýanyň medeniýet ministri Raşida Dati ogurlanan bezeg önümlerini “bahasyna ýetip bolmajak” diýip atlandyrdy. Ol hüjümiň zorluksyz bolup geçendigini aýtdy: “Biz wideo ýazgylary gördük: olar adamlara topulmaýar-da, dört minutyň içinde arkaýyn girip, witrinalary döwýär, soňra ogurlanan zatlary alýar-da gidýär. Hiç hili zorluk ýok, ähli zat ýokary derejede gurnalan”.
Soňrak muzeýden uzak bolmadyk ýerde ogurlanan zatlaryň biri – imperator aýaly Ýewgeniýanyň täji tapyldy. 1855-nji ýylyň Bütindünýä sergisi üçin taýýarlanan bu täç 1354 göwher we 56 zümerret bilen bezelen. Ministriň aýtmagyna görä, tapynda zeper ýeten eken, ähtimal, ogrular gaçan wagty ony ýere gaçyran bolsa gerek.
Agşam Le Parisien ýene bir ogurlanan predmetiň tapylandygyny habar berdi, ýöne häkimiýet entek bu maglumaty resmi taýdan tassyklamady.
Polisiýa wakanyň bolan ýerinde ýylmaýjy guraly, galaýy lampasyny, benzini, ellikleri, rasiýany we ýorgany, şeýle-de jenaýatkärleriň özüni işçi hökmünde görkezmek üçin ulanan sary ýeňsizini tapdy.
Fransiýanyň içeri işler ministri Loran Nunýes ogurlygyň dogry ýedi minut dowam edendigini belledi.
Bolan waka eýýäm 1911-nji ýylda “Mona Lizanyň” ogurlanany bäri taryhda iň “batyrgaý” ogurlyk diýlip atlandyrylýar.
