Ferrari özüniň Elettrica kod atly ilkinji elektromobili barada maglumatlar bilen paýlaşdy. Onuň premýerasy 2026-njy ýylyň tomsuna meýilleşdirilýär. Täze ulag umumy kuwwaty tas 1000 at güýjüne deň bolan dört elektrik hereketlendirijisine we 530 kilometrden gowrak ýol ätiýajy bilen 122 kWt/sag sygymly akkumulýatora eýe bolar.
Öňdäki hereketlendiriji 282 at güýjüni, yzky hereketlendirijiler bolsa 831 at güýjüni berýär. Boost režiminde umumy kuwwat 986 at güýjünden geçýär. Awtomobil 2,5 sekuntda tizligini 100 km/sag çenli artdyrýar, iň ýokary tizlik bolsa 310 km/sag ýetýär. Sürüjiler Range, Tour we Performance režimlerini saýlap biler. Torque Shift Engagement ulgamy bolsa kuwwaty we aýlanma güýjüni bäş derejede sazlamaga mümkinçilik berer.
Akkumulýator kuzowyň düýbüne oturdyldy, bu bolsa agyrlyk merkezini 80 mm peseldýär. Şassi we kuzow 75% gaýtadan işlenen alýuminden ýasaldy.
Elektrokarda ses hem aýratyn ünsi çekýär: Ferrari hereketlendiriji sesiniň sanly öýkünmesinden ýüz öwürdi. Munuň deregine ýörite datçik hereketlendirijileriň we beýleki elektrik komponentleriniň hakyky iş ýygylyklaryny we wibrasiýalaryny tutýar. Soňra bu sesler güýçlendirilip, daşyna çykarylýar – bu elektrik gitaradaky ýalydyr, onda ses guralyň özi däl-de, güýçlendiriji tarapyndan döredilýär.
Elettrica ulagynyň önümçiligi ýörite elektromobilleri we gibridleri çykarmak üçin gurlan Maranellodaky täze E-Building zawodynda ýola goýlar.
