Kolizeýde Rim imperatorlarynyň ulanan gizlin ýerasty geçelgesiniň dikeldiş işleri tamamlandy. Indi ony syýahatçylar görüp biler diýip, Daily Mail ýazýar.
Geçelge I we II asyrlaryň aralygynda, amfiteatryň özi gurlandan birnäçe wagtdan soň gurlupdyr. Häzirki günde onuň uzynlygy 55 metre barabar, ýöne 2 müň ýyl ozal geçelge has uzyn bolupdyr – onuň bir bölegi lagym turbalary geçirilende ýumrulypdyr. Ylmy gözlegçiler ötük gönüden-göni imperatorlaryň oturýan ýerinden başlap, münberleriň aşagyndan geçip, arenanyň günorta çetine çykypdyr diýip hasaplaýar.
Kolizeýiň Arheologiki seýilgähiniň işgärleriniň pikiriçe, bu geçelge arkaly imperatorlar gladiator söweşlerinden soň köpçülige görünmezden arenadan gidip bilipdir. Şeýle-de, ötük amfiteatry Ludus Magnus söweşijiler mekdebi bilen birleşdiripdir diýlip çak edilýär. Bu ýerde imperator gladiatorlary çykyşlardan öň görüp bilipdir.
Geçelge XIX asyrda ýüze çykaryldy, ýöne diňe häzir, doly dikeldiş işlerinden soň taryhda ilkinji gezek oňa syýahatçylar baryp bilýär. Hünärmenler mermer diwarlary we poly dikeltdi, bezeg böleklerinde bolsa metal berkitmeleriň yzlary we mifologiki sahnalaryň suratlary saklanyp galypdyr. Girelgede awlary, aýy söweşlerini we akrobatik çykyşlary şekillendirýän freskalar görünýär.
