Türkmenistanyň Magtymguly adyndaky Ýaşlar guramasynyň Merkezi geňeşiniň ýanyndaky «Arkadagly Ýaşlar» žurnalynyň döredijilik topary bu elektron neşiriň sentýabr aýyndaky sanyny okyjylara hödürledi. Žurnalyň bu gezekki sany Garaşsyzlygymyzyň şanly 34 ýyllyk toýuna beslenen aýyň dowamyndaky esasy wakalara bagyşlanýar.
Baýramçylygyň öňüsyrasynda Türkmenistanyň Prezidentiniň gol çeken resminamalary bilen döwlet sylaglaryna mynasyp bolan Türkmenistanyň Magtymguly adyndaky Ýaşlar guramasynyň wekilleriniň, üstümizdäki ýylda talyplyk bagtyna eýe bolan ýaşlaryň birnäçesiniň çykyşlary žurnalda getirilýär.
Neşiriň täze sanynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işleri öz beýanyny tapýar. Sanly ulgamyň hukuk üpjünçiligi baradaky çykyş bar. Sanly dünýä baradaky söhbet indiki sahypalarda hem dowam etdirilýär. Neşirde ylym we tehnika täzelikleri hem paýlaşylypdyr.
Žurnalyň sahypalarynda ýurdumyzyň ýaşlarynyň arasynda geçirilen ylmy işleriň bäsleşiginiň üstümizdäki ýylda ýeňijisi bolan ýaş alymlaryň birnäçesiniň alyp baran ylmy gözlegleri barada gürrüň berilýär.
Milli mirasyma ýüzlenmek neşiriň ilkinji sanlaryndan bäri dowam etdirilip gelinýär. Däp bolşy ýaly, neşirde ýaş döredijilik işgärleriniň täze şygyrlarynyň hem birnäçesini okap bilersiňiz.
Neşiriň ahyrky sahypalarynda bolsa aýlyk täleýnama, şeýle-de tagamly işdäaçaryň taýýarlanyş usullary barada maglumat berlipdir. Elektron neşiriň täze sany «Ýaş waspçy» bäsleşiginiň ýeňijisi baradaky maglumat bilen jemlenilýär.
