3-nji oktýabrda Aşgabatda “Ýaş tebigatçy” jemgyýetçilik guramasynyň döredilmeginiň 3 ýyllygy bellendi. Dabara jemgyýetçilik guramalaryň, ýokary okuw mekdepleriň, ilçihanalaryň we köpçülikleýin habar beriş serişdeleriniň wekilleri gatnaşdy diýip, guramada habar berdiler.
Dabaranyň açylyşynda çykyş eden “Ýaş tebigatçy” jemgyýetçilik guramasynyň direktory Leýli Şyhmädowanyň bellemegi görä, 2022-njy ýylyň güýzünde döredilen guramanyň esasy maksady ýurdumyzda ekologiýa howpsuzlygyny üpjün etmäge goşant goşmakdan we tebigaty goramak barada ilaty, esasanam, ýaşlary habarly etmekden, tebigy baýlyklary, ösümlik we haýwanat dünýäsini gorap saklamak we dikeltmek, tebigy serişdelerden rejeli peýdalanmak boýunça ýaşlaryň başlangyçlaryny goldamakdan we olary höweslendirmekden ybarat bolup durýar.
Häzirki güne çenli “Ýaş tebigatçy” jemgyýetçilik guramasy 35 sany daşky gurşaw çäresini, 73 sany okuw-seminarlary, 17 sany dürli bäsleşikleri, tebigat goraghanalara 7 gezek gezelençleri gurnady; şeýle hem köpçülikleýin habar beriş serişdelerinde 91 sany maglumat materiallary bilen çykyş etdi we ýurdumyzyň çäginde 30 müňe golaý bag nahallaryny oturtdy. Onuň 70 müňden gowrak agzasy bar.
Çäräniň dowamynda “Watan” gazetiniň redaksiýasy bilen bilelikde yglan edilen «Ýaş tebigatçy: ýaşyl dünýä, abadan geljek» atly döredijilik bäsleşiginiň jemi jemlendi. Bu bäsleşige gatnaşanlar öň metbugat sahypalarynda çap edilmedik we başga bäsleşiklere hödürlenmedik makalalaryny, şygyr, kyssa hem-de dürli žanrlarda ýazylan eserlerini hödürlediler. Bäsleşikde ýeňiji bolan Bekgylyjow Mukama, Batyrjanowa Marala, Ataýewa Ogulgerege, Şyhberdiýew Röwşene hem-de Zakirjanowa Ogulgerege guramaçylar tarapynda ýadygärlik sowgatlar gowşuryldy.
Şeýle-de guramanyň döredilmeginiň 3 ýyllygy mynasybetli bu ýere gelenleriň arzuwlary ýazylyp, ýörite gutynyň içine salnyp, ýene 10 ýyldan açmak maksady bilen arça agajy bilen bilelikde ekildi.
