13–20-nji sentýabr aralygynda Türkmen oba hojalyk instituty bilen Türkmen oba hojalyk uniwersitetiniň «Oba hojalygyny mehanizasiýasy» hünäriniň talyplary mugallymlary bilen bilelikde Germaniýada we Niderlandlarda ýokary derejeli önümçilik tejribesinden geçdiler. Tejribeligiň maksady dünýäniň öňdebaryjy oba hojalyk tehnikasy öndürijilerinden biri bolan John Deere kompaniýasynyň döwrebap tehnologiýalary bilen tanyşmak boldy.
Wekiliýet kompaniýanyň esasy kärhanalaryna we merkezlerine baryp gördi. Germaniýanyň Mangeým şäherinde talyplar John Deere zawodynda bolup, 6M we 6R seriýaly traktorlaryň doly önümçilik prosesini gözden geçirdiler. Olar ýygnama liniýalaryndaky ýokary awtomatizasiýa derejesine we robot tehnikalarynyň ulanylyşyna aýratyn üns berdiler. Şeýle-de wekiliýet Bruhzal şäherindäki traktor kabinalaryny öndürýän zawoda we ätiýaçlyk şaýlarynyň merkezi ammaryna bardylar.
Kaýzerslautern şäherindäki Ýewropa Tehnologiýalar we Täzelikler Merkezinde talyplar üçin okuw sapaklary guraldy. Tejribäniň amaly bölegi oba hojalyk işlerini meýilleşdirmek üçin Work Planner programma üpjünçiligini öwrenmegi hem-de döwrebap tehnikalaryň sanly dolandyryş usullaryny özleşdirmegi öz içine aldy.
Tejribelik Niderlandlaryň Horst şäherinde dowam etdi. Bu ýerde talyplar asma we özi ýöreýän pürküji tehnikalary öndürýän zawodda bolup, dökünleri takyk mukdarda pürkmegi üpjün edýän ExactApply ulgamy we otlary saýlap tanap pürkýän See and Spray innowasion ulgamlary bilen tanyşdylar.
Alnan tejribe talyplara döwrebap tehnologiýalary özleşdirmäge we geljekde oba hojalygynda peýdalanmaga uly kömek eder.
