Porsche, Audi we Mercedes ýaly gymmatbahaly awtoulag öndürijileri lýuks elektrokarlaryň satuwynyň azalmagy bilen ýüzbe-ýüz boldy. Bloomberg neşiriniň habar bermegine görä, satuwlaryň peselmegi sebäpli kompaniýalar täze modelleriň çykarylyş meýilnamalaryny we önümçiligi giňeltmek taslamalaryny täzeden seretmeli bolýarlar.
Porsche üç ýyl ozal elektrik awtoulaglarynyň benzinlilerden köp satyljakdygyna wada beripdi. Emma häzirki wagtda kompaniýa lýuks elektrokrossoweriniň önümçiligini togtadyp, beýleki elektrokarlarynyň çykarylyşyny yza süýşürýär. Çykdajylaryň artmagy we «Taycan» modeline bolan islegiň pesligi sebäpli Porsche indi gibrid we benzinli awtoulaglara has köp ünsi jemleýär.
Mercedes-Benz Group hem €110 müň duran flagman modeli EQS bilen şular ýaly kynçylyk çekýär. Audi-de bolsa Hytaýda elektrokar satuwy pese gaçdy, sebäbi ýerli brendler — BYD we Xiaomi has arzan alternatiwleri hödürleýärler.
Şol bir wagtyň özünde, BMW premium segmentinde has gowy netijeleri görkezýär: ýylyň ilkinji ýarymynda kompaniýanyň elektrokar satuwy 16% ýokarlandy. Ýöne BMW-niň hem lýuks modellerinde kynçylyklar bar, şonuň üçin kompaniýa olara bolan bahalary Ýewropada peseltmäge mejbur bolýar.
