Türkmenistanyň wise-premýeri M.Çakyýew Russiýa Federasiýasynyň Astrahan oblastynyň hökümetiniň başlygy Denis Afanasýewiň ýolbaşçylygyndaky wekiliýet bilen duşuşdy. Duşuşykda «Demirgazyk — Günorta» ulag geçelgesiniň çäginde bilelikdäki taslamalaryň durmuşa geçirilmegi ara alnyp maslahatlaşyldy.
Hususan-da, Astrahanda türkmen logistika merkezini gurmak meselesine garaldy. Oblastyň wise-gubernatory ýer çäginiň eýýäm bölünip berlendigini we degişli ylalaşyklara gol çekilendigini, bu ýagdaýyň taslamanyň başlanmagyna ýol açýandygyny mälim etdi.
Şeýle hem taraplar senagat hyzmatdaşlygyny giňeltmek barada ylalaşdylar: Astrahanyň gämi gurluşyk zawodlary Türkmenistanyň «Balkan» gämi gurluşyk zawodynyň bilelikdäki taslamalaryna gatnaşar. Mundan başga-da, Hazar deňiz we derýa ulag institutynyň binýadynda Türkmenistanyň gämi gatnadyjy we gämi gurluşyk kärhanalary üçin hünärmenleri taýýarlamak boýunça meseleler ara alnyp maslahatlaşyldy.
Duşuşykda ulag we syýahatçylyk gatnaşyklaryny ösdürmek, şol sanda Astrahan – Türkmenbaşy aralygynda göni howa gatnawlaryny ýola goýmak mümkinçiligi hem ara alnyp maslahatlaşyldy. Türkmenistan oktýabr aýynda geçiriljek Astrahanyň halkara «Demirgazyk — Günorta» forumyna öz gämi gurluşyk, gämi gatnadyjy we logistika kompaniýalarynyň gatnaşjakdygyny tassyklady.
Astrahan oblastynyň wekiliýetiniň sapary Türkmenistanyň Garaşsyzlygynyň 34 ýyllyk dabaralary bilen gabat gelip, myhmanlar bu dabaralara gatnaşdylar.
