Aşgabatda Döwlet münberiniň toplumynyň öňündäki meýdançasynda Türkmenistanyň Garaşsyzlygynyň 34 ýyllygy mynasybetli baýramçylyk ýörişi geçirildi.
Ir bilen Prezident Serdar Berdimuhamedow Garaşsyzlyk binasyna gül goýmak dabarasyna gatnaşdy. Bu dabara Hökümet agzalary, Mejlisiň, harby we hukuk goraýjy edaralaryň, ministrlikleriň, pudaklaýyn dolandyryş edaralaryň hem-de jemgyýetçilik guramalarynyň ýolbaşçylary, welaýatlaryň we Aşgabat şäheriniň häkimleri, ýaşulular, ýurdumyzda işleýän diplomatik wekilhanalaryň ýolbaşçylary we daşary ýurtly myhmanlar gatnaşdylar.
Baýramçylyk ýörişini harby güýçleriň ähli goşun görnüşleriniň harby ýörişli çykyşlary açdy. Soňra ýöriş deňiz giňişliginde dowam etdi: münberiň garşysyndaky uly ekranda Hazar deňziniň çäginde ýerleşýän harby-deňiz güýçleriniň gämileri göni ýaýlymda görkezildi. Soňra münberiň öňünden harby tehnikalar geçdi, onuň yzysüre ýöriş asman giňişliginde dowam etdi.
Şondan soň Prezident Serdar Berdimuhamedowa Zaman atly ahalteke bedewi sowgat berildi. Baýramçylyk ýörişi ýurduň ähli welaýatlarynyň hem-de ykdysadyýet pudaklarynyň wekilleriniň ýörişi bilen dowam etdi.
Teletomaşaçylar Türkmenistanyň Garaşsyzlyk güni mynasybetli guralan baýramçylyk ýörişine milli telewideniýede göni ýaýlymda tomaşa edip bildiler.
