26-njy sentýabrda Aşgabatdaky Mejlisler merkezinde Prezident Serdar Berdimuhamedowyň gatnaşmagynda medeniýet we sungat ussatlarynyň Türkmenistanyň Garaşsyzlygynyň 34 ýyllygyna bagyşlanan konserti geçirildi.
Dabara Hökümet agzalary, daşary ýurtlaryň we halkara guramalaryň Türkmenistanda işleýän diplomatik wekilhanalarynyň ýolbaşçylary, hormatly ýaşulular, ministrlikleriň, pudaklaýyn dolandyryş edaralarynyň, ylmy we döredijilik intelligensiýasynyň, ýokary okuw mekdepleriniň, köpçülikleýin habar beriş serişdeleriniň, ýurdumyzyň ähli welaýatlarynyň wekilleri, talyplar, şeýle-de baýramçylyk dabaralaryna gatnaşmak üçin Aşgabada gelen köp sanly daşary ýurtly myhmanlar gatnaşdylar.
Konsertiň maksatnamasy türkmen halkynyň bagtyýar durmuşyny üpjün etmegiň bähbidine Garaşsyzlyk ýyllarynda ýurdumyzda gazanylan ösüşleri şöhlelendirýän köpöwüşginli we ilkinji gezek ýerine ýetirilýän çykyşlar bilen tapawutlandy.
Ýurdumyzyň meşhur döredijilik toparlary, türkmen estradasynyň ýyldyzlary, folklor toparlary öz ussatlyklaryny görkezdiler.
Häzirki zaman tehnologiýalarynyň ulanylmagy konsertiň özboluşly mazmunyny ýüze çykardy. Sazandalaryň, meşhur halk we estrada aýdymlaryny ýerine ýetirijileriň ajaýyp çykyşlary Watanymyzyň ýeten sepgitlerini aýdyň şöhlelendirdi.
Gurbanguly Berdimuhamedowyň sözlerine, Kerim Berdimuhamedowyň sazyna döredilen “Ak şäherim Aşgabat” atly aýdym konserte gatnaşýan medeniýet we sungat ussatlarynyň birnäçesiniň, meşhur tans toparynyň bilelikde ýerine ýetirmeginde ýaňlanyp, Aşgabadyň täze taryhy döwürde gazananlarynyň senasy hökmünde kabul edildi.
Dabara gatnaşyjylaryň ählisiniň bilelikde ýerine ýetirmeginde ýaňlanan “Garaşsyz Diýarly, Arkadagly Serdarly baky bagtyýar türkmen” atly ajaýyp aýdym baýramçylyk konsertiniň jemlenmesine öwrüldi.
