Dubaýda Ginnesiň täze rekordy goýuldy: Roasters Specialty Coffee House kofehanasy bir çaşka kofeni 2500 dirhama (takmynan, $680) satdy. Bu barada Rekordlar kitabynda habar berilýär.
Rekord goýan kofe V60 süzgüjini ulanmak bilen purower usuly arkaly elde taýýarlandy. Içgi üçin bütin dünýäde bilermenler tarapyndan ýokary baha berilýän Panamadan seýrek Hacienda La Esmeralda Geisha däneleri saýlandy. Kofehanada kofeni alyjynyň ady aýan edilmedi.
Geisha görnüşi özüniň näzik tagamy bilen bellidir: onda jasminiň ysy we şänikli miweleriň tagam öwüşginleri duýulýar. Bu kofe kolleksionerleriň we hünärmen degustatorlaryň arasynda örän gymmatlydyr. Şeýle däne üçin baha rekord derejä ýetip bilýär.
Bu kofe görnüşiniň taryhy 1936-njy ýylda Efiopiýada başlady. Britan koloniýasynyň kapitany Riçard Uolli Ben-Maji sebitindäki Geýşa dagynyň golaýyndan ýabany kofeniň tohumlaryny ýygnady. Soňra olar genetiki banklar we gözleg stansiýalary arkaly Kosta-Rika, ondan soň Hacienda La Esmeralda plantasiýasyna gelip düşdi.
Ilkibaşda ol kömelek kesellerine durnuklylygy üçin gymmatly hasaplanýardy. Ýöne haçan-da Geisha agaçlary ýokary beýiklikde – deňiz derejesinden 1650 metr beýiklikde oturdylanda, bu görnüşiň özboluşly tagamy ýüze çykdy. Bu hem Geisha kofesine iň gymmat kofe görnüşleriniň biri hökmünde dünýä meşhurlygyna tarap ýol açdy.
