Häzirki Serbiýanyň Wiminasium şäherindäki gadymy Rim amfiteatrynyň golaýynda ýaşy takmynan 1700 ýyllyk aýy kellesiniň bölekleri tapyldy. Bu açyş aýylaryň gladiator söweşine gatnaşandygyny görkezýän ilkinji göni subutnamany berýär diýip, Live Science ýazýar.
Galyndylar 2016-njy ýylda tapylypdy, ýöne onuň jikme-jik beýany indi Antiquity žurnalynda berildi.
Kellesinde söweş wagtynda alnan şikesiň alamatlary görünýär, ýöne ondan biraz gijräk ölen bolmagy ähtimal. Bu kelläniň ýarasynyň bejergisinden we şikesiň kesel ýokuşma alamatlaryndan görünýär. DNK-nyň seljermesi haýwanyň takmynan alty ýaşyndadygyny ýüze çykardy.
Şeýle hem, haýwanyň gyýaklarynyň ýylmanandygy görünýär we barlagçylaryň bellemegine görä, haýwanyň äňindäki infeksiýanyň alamatlary onuň erkinlikde gezmändigi bilen baglanyşykly - aýylar kapasanyň gözeneklerini çeýnän bolmagy mümkin.
Biziň eýýamymyzyň II asyrynda gurlan Wiminasium amfiteatra 7000 tomaşaçy sygypdyr. Kelle girelgäniň golaýyndan, gaplaň ýaly beýleki haýwanlaryň süňkleriniň ýatan ýerinden tapyldy. Arheologlaryň maglumatlaryna görä, öldürilen haýwanlar meýdançanyň golaýynda pudarlanypdyr, aýratynlykda jaýlanmandyr.
Aýylar gladiator awçylar bilen ikiçäk tutluşyklara çykmaga mejbur edilip, beýleki haýwanlar bilen söweşmäge ýa-da jenaýatçylaryň jezalandyrylmagyna gatnaşmaga mejbur edilendir öýdülýär.
