Oguz han adyndaky «Türkmenfilm» birleşigi Tikenjik bilen Mymyjygyň başdan geçirmeleriniň 3-4-nji bölümleriniň önümçiligine girişdi.
6 ýaşa çenli çagalar üçin niýetlenen bu multserilada Tikenjik atly kirpijik bilen Mymyjyk atly towşanjygyň başdan geçirýän gyzykly wakalary beýan edilýär. Bu multserialyň “Gowy gün” atly seriasy Türkmenistanyň taryhynda ilkinji gezek 2025-nji ýylyň 4-7-nji awgustynda Gazagystanda geçirilen Halkara Ülker animasiýa festiwalyna gatnaşdy. Bu hem türkmen multfilm önümçiliginiň halkara standartlara laýyk öndürilýändiginiň subutnamasy bolup durýar.
Multserialyň birinji we ikinji bölümleri “Ýaşlyk” teleýaýlymy we «BeletFilm» onlaýn kinoteatrynda halk köpçüligin ýetirilip, uly gyzyklanma bilen iň köp görlen multfilmleriň arasyna girmegi başardy.
2D görnüşinde taýýarlanylýan «Tikenjik bilen Mymyjyk» atly multfilmiň gahrymanlary hemişe wagtlaryny bile geçirýärler. Olar gyzykly oýunlary agzybirlikde oýnaýarlar, ulularyň sözüne gulak asýarlar, biri-birini begendirmegi gowy görýärler, ýalňyşan ýerlerinde bolsa ötünç soramagy-da başarýarlar. Olaryň täsirli başdangeçirmelerine tomaşa etmek hemmeler üçin gyzykly.
Multserialyň birinji we ikinji bölümlerini «BeletFilm» onlaýn kinoteatrynda tomaşa edip bolýar. Şeýle hem 0530 gysga belgisine 871 ýazyp ugratmak arkaly göni internet salgysyny hem alyp bilersiňiz.
