Apple-iň baş direktory Tim Kuk täze iPhone modelleriniň bahasynyň ýokarlanmagynyň ABŞ-nyň Prezidenti Donald Trampyň administrasiýasynyň paç syýasaty bilen baglanyşykly däldigini aýtdy.
Ol bu barada CNBC-den Jim Kramer bilen söhbetdeşlikde belledi.
Apple iPhone 17 Pro we 17 Pro Max üçin bahalary 100 dollar gymmatlatdy, ýöne arzan modelleriň bahasyny üýtgetmedi. Mundan başga-da, kompaniýa Plus-yň ornuny çalşan in inçe Air smartfonyny hödürledi.
Bilermenleriň aýtmagyna görä, bahalaryň ýokarlanmagyna garaşylýardy. Apple üpjünçilik zynjyryny üýtgedip, gümrük paçlarynyň täsirini azaltmaga synanyşdy. Indi Hindistandan we Wýetnamdan smartfonlar ABŞ-a getirilip başlandy. Ozal esasy önümçilik Hytaýdady.
Muňa garamazdan, Kuk ikinji çärýekde kompaniýanyň gümrük paçlary bilen baglanyşykly goşmaça çykdajylar sebäpli, takmynan, 800 mln dollar ýitirendigini belläp geçdi.
Mundan başga-da, Apple-iň ýolbaşçysy CNBC-niň emeli aňyň haýal ornaşdyrylmagy baradaky maglumatyna teswir berdi. Aslynda, kompaniýada Apple Intelligence tehnologiýalaryny kämilleşdirmek bilen baglanyşykly meseleler ýüze çykdy, şol sebäpli ol bu ugurda bäsdeşlerinden yza galyp başlady diýlip hasaplanýar.
“Bizde EA smartfonlarda giňden ulanylýar, ýöne biz ony şeýle resmi atlandyrmaýarys” – diýip, Kuk düşündirdi.
