22-nji sentýabrda dünýä liderleri Türkmenistanyň Prezidenti Serdar Berdimuhamedowa doglan güni mynasybetli gutlaglaryny iberdiler. Gutlag hatlarynyň teksti Türkmenistanyň Döwlet habarlar agentligi tarapyndan çap edildi.
Türkmenistanyň Prezidentiniň 44 ýaş toýy mynasybetli Russiýanyň Prezidenti Wladimir Putin, Hytaý Halk Respublikasynyň Başlygy Si Szinpin, Türkiýäniň Prezidenti Rejep Taýyp Ärdogan, Koreýa Respublikasynyň Prezidenti Li Çže Mýon, Täjigistanyň Prezidenti Emomali Rahmon, Gyrgyzystanyň Prezidenti Sadyr Žaparow, Azerbaýjanyň Prezidenti Ilham Aliýew, Belarusyň Prezidenti Aleksandr Lukaşenko we Ermenistanyň Prezidenti Waagn Haçaturýan gutlaglaryny iberdiler.
Katar Döwletiniň Şeýhler maşgalasynyň agzasy Faýsal bin Naser bin Hamad Al Tani hem mähirli arzuwlaryny beýan etdi.
Şeýle-de gutlaglar Ýewraziýa ykdysady komissiýasynyň kollegiýasynyň başlygy Bakytžan Sagintaýewden, Russiýanyň Hökümetiniň Başlygy Mihail Mişustinden, Russiýa Federasiýasynyň Howpsuzlyk Geňeşiniň Başlygynyň orunbasary Dmitriý Medwedewden, Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkodan we RF-niň Astrahan oblastynyň gubernatory Igor Babuşkindan gelip gowuşdy.
Türkmenistanyň halkynyň adyndan Prezident Serdar Berdimuhamedowy Halk Maslahatynyň Başlygy Gurbanguly Berdimuhamedow gutlady.
«Siziň üstünlikli durmuşa geçirýän ykdysady syýasatyňyzyň netijesinde ýurdumyz häzirki wagtda dünýäde çalt depginler bilen ösýän döwletleriň hatarynda tanalýar. Bagtyýar döwrümiz, adamlaryň ýaşaýyş-durmuş derejesini ýokarlandyrmaga gönükdirilen beýik işler, durmuş taýdan goraglylyk halkymyzy çäksiz buýsandyrýar» diýlip, Halk Maslahatynyň Başlygynyň gutlagynda aýdylýar.
Gutlag hatlarynda Türkmenistanyň Prezidentine jan saglyk, bagt, abadançylyk we döwlet işlerinde täze üstünlikler arzuw edildi.
