Eli Lilly kompaniýasynyň Mounjaro derman serişdesi (tirzepatid) 2-nji görnüşli süýji keseli bolan çagalarda we ýetginjeklerde netijeliligini görkezdi. Ol synaga gatnaşanlara ganyň düzümindäki şekeriň gözegçiligini gowulaşdyrmaga we beden agramynyň indeksini (BAI) azaltmaga kömek etdi diýip, Reuters habar berýär.
Ylmy gözlegiň netijeleri Wenadaky süýji keselini öwrenmek boýunça Ýewropa assosiasiýasynda hödürlendi we The Lancet žurnalynda neşir edildi.
Ylmy gözlege 10-17 ýaşly 99 hassa gatnaşdy. Olar üç topara bölündi: bir topara hepdede bir gezek derman serişdesinden 5 mg, beýlekisine 10 mg, ýene bir topara bolsa plasebo berildi. 30 hepdeden derman serişdesini kabul eden çagalaryň 79%-inde HbA1c derejesi 6,5%-den aşak düşdi, ýarysyndan gowragy bolsa kadaly görkezijä ýetdi (5,7%-den aşak). Plasebo alan toparda şeýle görkezijilere, degişlilikde, diňe 29%-i we 14%-i ýetdi.
Munuň bilen birlikde derman serişdesi bedeniň agramyny azaltmaga kömek etdi: BAI 5 mg dozada 7,4% we 10 mg-de 11,2% azaldy, plasebo toparynda üýtgeşmeler 0,4% boldy. Täsir bir ýyl gözegçiligiň dowamynda saklandy.
Kompaniýa derman serişdesiniň çagalar üçin howpsuzdygyny, goşmaça täsirleriň bolsa ýeňil ýa-da aramdygyny we aşgazan-içege ýollary bilen baglanyşyklydygyny belledi. Maglumatlar Mounjaro-nyň görkezmelerini giňeltmek üçin eýýäm düzgünleşdiriji edaralara iberildi.
