14-nji sentýabrda “Kämil bilim” okuw merkeziniň Balkanabat şäherindäki şahamçasynda “Kitap – ýeňşiň açary” ady bilen kitap okamak boýunça bäsleşik geçirildi. Oňa Balkan welaýatynyň kitapsöýüjileriniň 300-e golaýy gatnaşdy diýip, guramaçylar habar berdi.
Ýaş nesilleri kitap okamaga çekmek we olaryň ýatkeşligini ýokarlandyrmak maksady bilen geçirilen bäsleşige gatnaşyjylara Rahmet Gylyjowyň «Halallyk kyssalary» hem-de Kömek Kulyýewiň “Ömür kerweni” atly eserleri boýunça test ýumuşlaryny tabşyryldy. Ýaryşyň şerti baradaky bildiriş okuw merkeziniň jemgyýetçilik torlardaky sahypalarynda paýlaşylypdy.
Bäsleşigiň netijeleri boýunça, birinji orna Balkanabat şäheriniň iňlis dili, fizika we matematika dersleri çuňlaşdyryp öwredilýän ýöriteleşdirilen 22-nji orta mekdebiniň türkmen dili we edebiýat mugallymy Hatyja Nurberdiýewa, ikinji orna şol mekdebiň okuwçysy Aziza Gulamowa, üçünji orna Balkan welaýatynyň Esenguly etrabynyň 8-nji orta mekdebiniň okuwçysy Nurjemal Nyýazmyradowa mynasyp boldy.
Bäsleşik Türkmenistanyň Bilim ministrliginiň Balkan welaýat Baş bilim müdirligi bilen “Kämil bilim” okuw merkeziniň Balkanabat şäherindäki şahamçasynyň bilelikde guramagynda geçirildi.
Ýeňijilere guramaçylar tarapyndan ýadygärlik sowgatlar gowşuryldy hem-de bu okuw merkezinde bilim almaklary üçin ýeňillikler döredildi.
