Toyota Kentukkidäki zawodynda iki sany täze doly elektrik ulaglarynyň – Land Cruiser bilen RAV4-üň önümçiligi üçin ýer boşatmagy meýilleşdirýär. Amerikan alyjylarynyň ýolsuz ýerden ýöreýän ulaglara gyzyklanmalarynyň artmagy we gümrük paçlaryndan gaçmak üçin ABŞ-da elektromobil önümçiligini ýokarlandyrmak zerurlygy bilen baglylykda kompaniýa Lexus ES sedanynyň önümçiligini Kentukkiden Ýaponiýa geçirmek kararyna geldi.
Ady getirilmeýän çeşme Reuters agentligine elektromobilleriň hut Kentukkide RAV4 we Land Cruiser modelleriniň esasynda çykaryljakdygyny habar berdi. Toyota-nyň wekili Motor1 çeşmesine kompaniýanyň “önümçilik netijeliligini ýokarlandyrmak we müşderileriň isleglerini kanagatlandyrmak üçin Kentukkidäki we Indianadaky zawodlaryň arasynda önümçiligi strategiki taýdan üýtgedýändigini” tassyklady.
Şol bir wagtyň özünde Toyota Indianadaky zawodda Grand Highlander ulagynyň önümçiligini giňelder, çünki bu üç hatarly benzin modeline isleg ýokary bolmagynda galýar. Lexus TX hem Indianada öndürilýär we ES-iň önümçiligi Ýaponiýa göçürilenden soň, bu model Lexus-yň ABŞ-da çykarylýan ýeke-täk önümi bolar.
Ozal Toyota elektrikleşdirmek strategiýasyna seresaply çemeleşip, gibrid hataryny giňeltmäge ünsi gönükdirdi. Bu hem üstünlikli strategiýa boldy. Häzirki wagtda kompaniýa elektromobil bazaryna işjeň çykýar we 2027-nji ýyla çenli ABŞ-da ýedi sany täze model hödürlemegi meýilleşdirýär.
