Ukrainaly boksçy Aleksandr Usik özüniň ähli çempionlyk guşaklaryndan ýüz öwürmek barada netijä geldi. Ol bu barada özüniň sosial ulgamlaryndaky sahypalarynda mälim etdi.
«Şu gün howa gowy we meniň häzirki eýelik edýän ähli guşaklarymy boşatmak isleýändigimi aýtmak üçin gowy gün. Nobatda duran ýigitleriň bu guşaklar ugrunda göreşip bilmegi üçin olaryň boş bolmagyny isleýärin» – diýip, 39 ýaşly ukrainaly boksçy yglan etdi.
Şol bir wagtda Usik karýerasyny tamamlamagy meýilleşdirmeýändigini we entek «iň soňky tansyň» boljakdygyny aýratyn belledi.
«Bu meniň oýlanyşykly kabul eden çözgüdim we ol meniň üçin täze mümkinçilikleri açar diýip ynanýaryn. Bu taryhyň soňy däl. Dowamy entek öňde» – diýip, boksçy sözüniň üstüne goşdy.
Aleksandr Usik professional ringde geçiren jemi 25 urşunyň ählisinde ýeňiş gazandy (olaryň 16-sy wagtyndan öň). Ol özüniň iň soňky duşuşygynda, 23-nji maýda Niderlandlaryň kikboksçysy Rik Werhoweni 11-nji raundda tehniki nokaut bilen ýeňip, WBC-niň çempionlyk titulyny gorady. Häzirki güne çenli ol super agyr agram derejesinde Halkara boks federasiýasynyň (IBF), Bütindünýä boks assosiasiýasynyň (WBA) we Bütindünýä boks geňeşiniň (WBC) çempionlyk guşaklaryna eýeçilik edýärdi.
