OpenAI-yň döredijilik hünärmeni Çad Nelson özüniň gysga metražly “Ownuk jandarlar” multfilmini doly metražly multfilme öwrer. Taslama DALL-E 2 neýroulgamynyň kömegi bilen döredildi diýip, The Wall Street Journal ýazýar.
Geljekki wersiýanyň ilkinji görkezilişini 2026-njy ýylyň maý aýynda Kann film festiwalynda geçirmek meýilleşdirilýär.
Multfilmiň ýordumy jadyly tokaýdaky obasyna syrly bir nätanyş adam gelenden soň, syýahata çykan üýtgeşik jandarlar hakda gürrüň berýär.
Filmi 30 million dollara ýetmeýän býujet bilen dokuz aýyň içinde surata düşürip tamamlamak meýilleşdirilýär. Adatça, doly göwrümli multfilmi öndürmek üçin üç ýyl wagt we 100 million dollar töweregi serişde gerek bolýar.
Ssenariniň üstünde “Paddingtonyň başdan geçirenleri 3-iň" awtorlary Mark Berton, Jon Foster we Jeýms Lamont işleýär. Häzirki wagtda ses berjek aktýorlary seçip almak işleri dowam edýär.
Animasiýada emeli aňyň ulanylmagy jedelli meselesi bolup galýar. Disney ozal şuňa meňzeş wariantlary göz öňünde tutupdy, ýöne olary ret edipdi.
Mysal üçin, “Moana” döredilende Dueýn Jonsonyň dipfeýkini ulanmak meýilleşdirilipdi: bedeni doganoglany Tanoai Rid oýnamalydy, ýüzi bolsa Metaphysic neýroulgamy tarapyndan döredilmelidi. Awtorlyk hukugy töwekgelçiligi sebäpli, düşürilen kadrlar soňky wersiýa girizilmedi.
“Tron: Ares” filminde Disney Bit atly sanly gahrymanyň replikasy üçin AI-ni ulanmak isledi, ýöne abraýdan gaçmak töwekgelçiligi sebäpli bu pikirden ýüz öwürdi.
