Arheologlar Gruziýadaky gowakda ösümlikleriň iýmit üçin däl-de, boýag hökmünde ulanylandygynyň ilkinji göni subutnamalaryny tapdylar. Ýaşy 32000 - 34000 ýyl bolan daş üweýji gurallarda indigoferanyň yzlary tapyldy diýip, Arkeonews ýazýar.
Barlagçylar bu açyşy tassyklamak üçin häzirki zaman usullaryny: mikroskopiýany, kompýuter tomografiýasyny we Raman spektrometrini ulandylar. Bu tehnologiýalar gök reňkiň häsiýetli öwüşginine jogapkär madda bolan indigotiniň ownuk gök bölejiklerini kesgitlemäge mümkinçilik berdi.
Paleolit döwründe ösümlikleriň ulanylyşy baradaky maglumatlar şu wagta çenli gaty çäklidi. Esasy üns has gowy saklanýan daş gurallaryna we haýwan süňklerine gönükdirilýärdi. Täze açyş şol döwrüň adamlarynyň ösümlikleri başga maksatlar üçin - boýaglar we belki-de bejeriş maksady üçin ulanandygyny görkezýär.
Arheologlar gowakdan tapylan alty sany daş guraly gözden geçirdiler. Olaryň bäşisinde iýlip könelmäniň we ösümlik tegmilleriniň alamatlary ýüze çykaryldy. Barlag synaglary bölejikleriň on müňlerçe ýyl ozal daşyň öýjüklerine girizilendigini tassyklady.
Alymlar Isatis tinctoria ösümliginiň ýapraklarynyň indigo almak üçin we belki-de, mikroblara garşy häsiýetleri üçin owradylan bolmagynyň mümkindigini aýdýarlar. Bu açyş paleolit döwrüniň adamlarynyň durmuşynyň has az öwrenilen taraplaryna göz aýlamaga seýrek mümkinçiligi berýär.
