Google kompaniýasy Gemini emeli aňynyň esasyndaky önümleri üçin üç möhüm täzelenme hödürledi.
Esasy täzelik Gemini çat-botunyň audio ýazgylaryna düşünip, olary tekste öwrüp bilmegi boldy. Indi ulanyjylar transkribasiýa üçin audiofaýllary ýükläp bilýär. Mugt ulanyjylar 10 minut dowam edýän ýazgylary ýükläp, günde bäş gezek ýüz tutup biler. AI Pro we AI Ultra ýazylyşyklarynyň eýeleri üç sagada çenli dowam edýän ses ýazgylaryny işläp biler. Ulgam dürli formatlarda 10 faýly, şol sanda ZIP arhiwlerini goldaýar.
Mundan başga-da, “Google Gözleg” EA režimi indi bäş dilde elýeterli: hindi, indoneziýa, ýapon, koreý we braziliýalylaryň portugal dili. Bu Gemini 2.5-iň “Gözlege” goşulmagy netijesinde mümkin boldy.
Gemini-niň esasynda işleýän NotebookLM programma üpjünçiligi hem indi okuw gollanmalaryny, gysga synlary, blog üçin postlary, ulanyjy tarapyndan ýüklenen resminamalaryň, faýllaryň we beýleki medialaryň esasynda fleş-kartlary we wiktorinalary döredip bilýär. Funksiýalar 80-den gowrak dilde elýeterli bolup, ulanyjylar hasabatyň formatyny, äheňini we stilini sazlap biler. Täzelenme hepdäniň ahyryna çenli doly elýeterli bolar diýlip garaşylýar.
Bu üýtgeşmeler Google-yň soňky bir aý bäri girizýän täzelenmeleriniň bir bölegidir. Ozal Gemini ulanyjy isleglerini awtomatik ýatda saklap başlady, mugt ulanyjylar bolsa wideo döretmek üçin Vids guralyna we Google Photos-da suratlardan gysga wideo döretmek funksiýasyna elýeterli boldy.
