Ýewrokomissiýa Google-yň baş kompaniýasy bolan Alphabet-e mahabat tehnologiýalarynyň bazarynda agdyklyk ediji ornundan hyýanatçylykly peýdalanandygy üçin 2,95 mlrd ýewro jerime saldy. Bu barada Bloomberg agentligi habar berdi.
Komissiýanyň maglumatlaryna görä, Google diňe öz hyzmatlarynyň we hyzmatdaşlarynyň bähbidine hereket edip, olara artykmaçlyk berdi. Bu hem onlaýn mahabat bazarynyň üýtgemegine we beýleki kompaniýalaryň onuň bilen bäsdeşlik edip bilmezligine getirdi. Ýewrokomissiýa kompaniýany şeýle tejribäni bes etmäge borçlandyrdy.
Google bu çözgüde garşy çykmakçydygyny aýtdy. Kompaniýanyň kadalaşdyryjy meseleler boýunça wise-prezidenti Li-Enn Malholland täze çözgüdiň “müňlerçe Ýewropa kompaniýalaryna zyýan ýetirip, olaryň pul gazanmak mümkinçiligini kynlaşdyrjak üýtgeşmeleri talap edýändigini” belledi.
Ýewropa düzgünleşdirijileriniň çözgüdine jogap hökmünde ABŞ-nyň Prezidenti Donald Tramp 1974-nji ýylyň Söwda kanunynyň 301-nji maddasy boýunça derňewe başlajakdygy bilen haýbat atdy.
“Şu gün Ýewropa ýene bir amerikan kompaniýasyna - Google-a zyýan ýetirip, 3,5 mlrd dollar jerime salmak bilen, amerikan maýa goýumlaryna we iş orunlaryna sarp edilip bilinjek pullary aldy” – diýip, Ak tamyň ýolbaşçysy aýtdy.
Bloomberg bu çözgüdiň ÝB bilen ABŞ-nyň arasyndaky söwda gatnaşyklarynyň dartgynlaşýan döwründe kabul edilendigini belleýär. Ozal Ýewrokomissiýa Google-a jerime salypdy: 2017-nji ýylda – 2,4 mlrd ýewro, 2018-nji ýylda – 4,3 mlrd ýewro. 2024-nji ýylyň sentýabrynda kompaniýa 2017-nji ýyldaky iş boýunça kazyýetden gutarnykly ýeňildi. 2023-nji ýylda Ýewrokomissiýa meseläniň ýeke-täk çözgüdiniň biznesiň bir bölegini bermegiň boljakdygyny duýdurypdy.
