Tesla kompaniýasynyň hindi bazaryna çykmagy garaşylan tamany ödemedi. Iýun aýynyň ortalarynda satuw başlany bäri kompaniýa bary-ýogy 600 sargyt kabul etdi, bu bolsa meýilnamadan ep-esli azdyr. Bloomberg-iň maglumatlaryna görä, ilkibaşda Tesla ýyl üçin meýilleşdiren 2500 awtomobiliniň ählisini satmagy göz öňünde tutupdy.
Çeşmeler şu ýyl kompaniýanyň Hindistana 350 – 500 awtomobil ibermegi meýilleşdirýändigini habar berýär. Ilkinji toplum sentýabryň başynda Şanhaýdan gelmeli. Üpjünçilik häzirlikçe Mumbai, Deli, Puna we Gurgaon şäherleri bilen çäklendiriler.
Hindistanyň bazaryna çykmazdan öň kompaniýa brendiň meşhurlygyna bil baglapdy, ýöne ýokary import paçlary, çylşyrymly bazar gurşawy we ABŞ bilen Hindistanyň arasyndaky ikitaraplaýyn gatnaşyklaryň ýaramazlaşmagy satuwyň netijelerine täsir etdi. Hindistanda esasy Tesla Model Y modeliniň bahasy 6 mln rupiýadan gowrak (takmynan, 68 müň dollar) bolup, bu bazardaky elektromobilleriň ortaça bahasyndan ep-esli ýokarydyr. Olaryň bahasy 2,2 mln rupiýa (takmynan, 24,9 müň dollar) barabar. Häzirlikçe elektromobiller ýurtda tutuş awtomobil satuwynyň 5%-den gowragyny emele getirýär.
Muňa garamazdan, sargyt möçberi premium segment üçin o diýen az däl – 2025-nji ýylyň birinji ýarymynda Hindistanda 4,5 – 7 mln rupiýa (takmynan, 51-79 müň dollar) aralygynda 2800-den gowrak elektromobil satyldy. Tesla Mumbai we Deli şäherlerinde Supercharger stansiýasyny gurmak we 2026-njy ýylda günorta şäherlerde üçünji merkezi meýilleşdirmek bilen, ýurtda barlygyny giňeltmegi dowam etdirýär.
