1-nji sentýabrdan Hytaýyň WeChat (Tencent Holdings) we Douyin (ByteDance) ýaly uly sosial ulgamlary emeli aňyň kömegi bilen döredilen onlaýn kontentleriň ählisine bellik goýup başlady. Muny täze kanun talap edýär diýip, South China Morning Post habar berýär.
Martda kabul edilen kanun Senagat we maglumatlaşdyrma ministrligi, Jemgyýetçilik howpsuzlygy ministrligi we Hytaýyň döwlet radioýaýlym we telewideniýe edarasy bilen bilelikde HHR-iň Döwlet internet-maglumat kanselýariýasy tarapyndan taýýarlandy.
Talaplara laýyklykda, ähli ulgamlar emeli aň bilen döredilen tekstler, suratlar, audio, wideo we beýleki wirtual kontent üçin görnetin we gizlin bellikleri ulanmaly. Görnetin bellikler ulanyjylara görünmeli, gizlin görkezijiler bolsa, mysal üçin sanly suw bellikleri – meta-maglumatlara girizilmeli.
1,4 milliarddan gowrak ulanyjysy bolan WeChat kontent awtorlarynyň emeli aňyň kömegi bilen döredilen materiallary meýletin bellik etmelidigini habar berdi. Platforma goşulan bellikleri aýyrmagyň, ýoýmagyň, ýasamagyň ýa-da gizlemegiň, şeýle-de ýalan maglumatlary, awtorlyk hukuklaryny bozýan kontenti ýa-da başga bikanun hereketleri döretmek ýa-da ýaýratmak üçin EA ulanmagyň gadagan edilýändigini duýdurdy.
Hytaýyň beýleki sosial ulgamlary hem şeýle talaplary öňe sürdi. Aýda 766,5 million işjeň ulanyjysy bolan Douyin awtorlary her bir EA kontentine görünýän bellikleri goşmaga çagyrýar we meta-maglumatlar arkaly onuň çeşmesini yzarlaýar.
Weibo mikroblog saýty ulanyjylara ýerliksiz kontentler barada habar bermäge mümkinçilik berýän “Bellik edilmedik EA kontenti” opsiýasyny goşdy.
