Aýdymçy Teýlor Swift bilen amerikan futbolynyň oýunçysy Trewis Kelsiniň adaglanmagy göwherleriň bazaryna uly täsir etdi diýip, The Wall Street Journal habar berýär.
Neşiriň maglumatlaryna görä, 26-njy awgustda, adaglanmanyň yglan edilen güni Signet Jewelers we Brilliant Earth zergärlik kompaniýalarynyň paýnamalary, degişlilikde, 3% we 26% ýokarlandy. Iň uly göwher eksportçysy bolan Hindistandan harytlara ABŞ-nyň 50 göterimlik paçlarynyň girizilendigine garamazdan, soňky günlerde bu kompaniýalaryň paýnama bahalary ösmegini dowam etdirip, 5 günde 3,4% we 35,8% goşdy.
Soňky ýyllarda tebigy göwherleriň bazary kynçylyk bilen ýüzbe-ýüz bolýar: emeli daşlar önümçilikde arzan düşýär we uly girdeji getirýär. Bu hem şeýle bezegleriň bahalaryny elýeterli edýär, olara bolan isleg hem ýokary bolýar. Analitikler bazaryň iri oýunçylarynyň hem tebigy, hem emeli daşlar bilen işleýändigini, munuň hem olaryň ornuny berkitmäge kömek edýändigini belleýär.
CNBC Trewis Kelsi tarapyndan sowgat berlen ýüzügiň 250-500 müň dollar bilen bahalandyrylýandygyny habar berýär. Aýdymçy tarapyndan hödürlenen suratlarda tebigy daşly ýüzük görünýär. Hünärmenleriň pikiriçe, tema bolan gyzyklanma emeli göwherli bezeg önümleriniň hem satuwyna itergi berip biler.
Adaglanma baradaky habaryň töwereginde gyzgalaňyň artýan döwründe Netflix-iň Swift bilen Kelsiniň gatnaşygy barada dokumental film düşürmek hukugyny satyn almakçydygy belli boldy. Kompaniýa oňa uly býujet bölüp aýyrmaga taýýar diýip, The Sun neşiri ýazýar.
“Mundan başga-da, Netflix aşyk-magşuklaryň toýuna eksklýuziw elýeterlilik almak üçin göreşmegi meýilleşdirýär. Ol uly waka bolar we platforma wakalaryň jümmüşinde bolmak isleýär” – diýip, çeşme habar berýär.
