Meşhur aýdymçy Teýlor Swift ABŞ-nyň Patentler we haryt nyşanlary edarasyna haryt nyşanlaryny hasaba aldyrmak üçin üç sany arza tabşyrdy diýip, Variety neşiri habar berýär.
Arzanyň ikisi aýdymçynyň sesi bilen baglanyşykly bolup, olar «Hey, it's Taylor Swift» («Salam, bu Teýlor Swift») we «Hey, it's Taylor» («Salam, bu Teýlor») diýen sözlemleri öz içine alýar.
Üçünji arza daşky keşbe degişlidir. Onda aýdymçy gara kemer dakylgy gülgüne gitaraly, kümüş bezegli reňbe-reň lybasly we ädikli görnüşde suratlandyrylýar.
Neşiriň berýän maglumatyna görä, bu ädimler aýdymçynyň keşbiniň we sesiniň emeli aň tarapyndan döredilýän materiallarda rugsatsyz ulanylmagynyň öňüni almaga gönükdirilendir.
Bu arzalary ýüze çykaran intellektual eýeçilik boýunça aklawçy Joş Gerben şeýle düşündirýär:
– Teoretiki taýdan, eger Swiftiň sesini ulanýan emeli aňa garşy kazyýet işi gozgalsa, ol özüniň hasaba alnan haryt nyşanyna meňzeş islendik ses ulanylyşynyň hukuklaryny bozýandygyny öňe sürüp biler.
Şeýle-de ol goragyň aýdymçynyň daş keşbi üçin hem degişlidigini belleýär.
Arzalar Teýlor Swifte degişli bolan TAS Rights Management kompaniýasy tarapyndan tabşyryldy.
