Teýlor Swiftiň «1989» (2014) albomy we Beýonseniň «Single Ladies (Put a Ring on It)» aýdymy ABŞ-nyň Milli ses ýazgylarynyň sanawyna (reýestr) — medeni, taryhy ýa-da estetik taýdan ähmiýetli diýlip ykrar edilen işleriň sanawyna girizildi.
Şeýle hem sanawa Weezer rok toparynyň 1994-nji ýylda çykan we «The Blue Album» ady bilen bilinýän «Weezer» atly ilkinji albomy, Çaka Hanyň «I Feel For You» aýdymy we 1993-nji ýylda çykan Doom oýnunyň saundtreki hem goşuldy.
Häzirki wagtda Milli sanawda 700-e golaý at bar. Oňa Lui Armstrong, Dýuk Ellington, Maýls Dewis, Green Day, Jay-Z we Alişa Kiz ýaly sazandalaryň ýazgylary girýär. Bu sanawyň amerikan derejesiniň bolmagyna garamazdan, oňa daşary ýurtly ýerine ýetirijiler hem goşulýar. Mundan ozal oňa Selin Dion, Queen topary we Emi Waýnhaus dagy hem girizildi.
Teýlor Swiftiň soňky albomy «The Life of a Showgirl» 2025-nji ýylyň oktýabrynda çykdy. ABŞ-da satuwyň ilkinji hepdesinde albomyň 4 milliondan gowrak nusgasy satyldy. Onuň «The Fate of Ophelia» we «Opalite» atly aýdymlary Billboard 200 sanawynda birinji orunlary eýeledi, üstesine-de, «The Fate of Ophelia» aýdymy on hepdeläp iň ýokary orunda galmagy başardy.
Beýonseniň soňky albomy «Cowboy Carter» 2024-nji ýylyň ýazynda çykdy. Bu iş kantri žanrynyň öwrenilmegine bagyşlandy we aýdymça öz karýerasynda ilkinji gezek «Ýylyň albomy» ugry boýunça «Gremmi» baýragyny getirdi.
«Weezer» toparynyň soňky doly göwrümli relizi bolsa 2022-nji ýylda çykarylan SZNZ atly konseptual mini-albomlar tapgyrydyr. Ol «Spring», «Summer», «Autumn» we «Winter» atly 4 sany möwsümleýin EP-den ybarat.
