Beýik Britaniýada diňläniňde şokoladyň süýji tagamyny has güýçlendirýän saz döredildi diýip, New York Post habar berýär.
Bristol uniwersitetinden kompozitor we ses boýunça hünärmen Natali Hiasint soňky 60 ýylda sazyň tagam duýgularyna ýetirýän täsiri baradaky ylmy gözlegleri öwrendi. Ol akgynly owazlaryň şokolady has süýji edip, “agzyňda eredýändigine”, ýiti notalaryň bolsa ajy tagamy güýçlendirýändigine ünsi çekdi.
Hiasintiň kompozisiýasyny ulanyp, Galaxy Chocolate kompaniýasy Sweetest Melody ady bilen 90 sekuntlyk aýdym döretdi. Onda fortepiano we arfa ýaňlanýar. Kompozisiýanyň aýratynlygy tagamdan arkaýynlyk bilen lezzet almagyň depginine gabat gelýän minutda 78 urgy depginidir.
Natali gajetleri bir gapdala goýup, gowy görýän şokoladyňdan bir bölek almagy we nauşnik dakyp, Sweetest Melody sazyny açmagy, soňra gözüňi ýumup, sazyň kömegi bilen ähli tagam duýgularyna aralaşmagy maslahat berýär.
Galaxy tagam bilen sazy birleşdirip, şokolady “duýgularyň simfoniýasyna” öwürmek isländigini belleýär. Kompozisiýa diňlemek üçin YouTube-da we Spotify-da elýeterlidir.
