Hytaý Halk Respublikasyna saparynyň çäklerinde Türkmenistanyň wekiliýetiniň agzalary Hytaýyň Sun Sinlin adyndaky ylmy-tehniki we medeni gatnaşyklar boýunça ýaşlar merkezine baryp gördüler. Bu ýerde myhmanlary Hytaýyň Sun Sinlin adyndaky gaznasynyň başlygynyň orunbasary hanym Şen Beili garşylady.
Merkez bilen tanyşlyk onuň köpugurly işini beýan edýän wideoşekilleriň görkezilmegi bilen başlandy.
Soňra türkmen wekiliýeti merkezdäki çagalar bakja-bagynda bilim we terbiýe bermegiň döwrebap usullary, çagalaryň sazlaşykly ösmegi üçin döredilen şertler bilen tanyşdylar. Hususan-da, bu ýerde körpelere interaktiw enjamlar arkaly fizikanyň we mehanikanyň başlangyç kanunlary barada düşünje berilýär. Munuň özi çagalaryň ownuk hem iri motorikasyny ösdürmäge ýardam berýär. Bölümiň “Ýagtylyk we reňkler” atly zolagynda çagalar ýörite ekranlarda şöhle bilen surat çekýärler. Şeýle oýunlar olaryň döredijilik ukyplaryny ösdürýär. “Tebigatyň owazlary” atly zolakda çagalar sesler dünýäsi bilen tanyşýarlar. Olar dürli jandarlaryň seslerini diňleýärler, adaty bolmadyk saz gurallarynda dürli owazlary döredýärler. Bu bolsa çagalaryň aýdym-saz ukyplaryny ösdürmäge ýardam berýär.
Çagalar bakja-bagy bilen tanyşlykdan soňra, Oguljahan Atabaýewa merkeziň “Innowasiýalar giňişligi” bölümine baryp gördi. Bu ýerde çagalar programmirlemegiň we konstruktorçylygyň esaslaryny özleşdirip, robot nusgalaryny döredýärler. Mundan başga-da, çagalar 3D, sanly modelirleme, emeli aň ugurlary boýunça bilim alýarlar. Şeýle hem bu ýerde asman jisimlerini öwrenmek bölümi ýerleşýär. Ol çagalaryň astronomiýa, tebigy ylymlara höwesini artdyrmaga ýardam berýär.
Merkezde türkmen wekiliýeti çaga attraksionlar toplumy bilen tanyşdyryldy. Bu toplum çagalar üçin diňe bir güýmenje bolman, eýsem, olaryň fiziki işjeňligini ösdürmäge hem kömek edýär. Merkez bilen tanyşlygyň dowamynda haýyr-sahawat gaznasynyň wise-prezidenti bu ýerde bilim alýan çagalar bilen ýadygärlik surata düşdi we olara sowgatlary gowşurdy.
Şeýle hem bu ýerde türkmen wekiliýetiniň hormatyna Hytaýyň gadymy çaý taýýarlamak sungaty görkezildi. Hytaý halkynyň bu däbi çaýdan lezzet almak bilen bir hatarda, onuň filosofiýasyna düşünmäge-de mümkinçilik berýär.
Merkezde Hytaýyň milli medeniýeti we medeni mirasy bilen tanyşdyrýan bölüm hem hereket edýär. Interaktiw sapaklar arkaly milli medeniýeti gorap saklamak, wagyz etmek bu bölümiň esasy wezipesi bolup durýar. Bölümde ýokary hünär derejeli mugallymlar çagalara milli medeniýetiň dürli ugurlary, şol sanda kalligrafiýa, şekillendiriş sungaty, küşt, keşdeçilik sungaty boýunça sapak berýärler.
Merkez bilen tanyşlygyň dowamynda Hytaýyň Min we Sin nesilşalyklarynyň zenan lybaslary, taryhy şaý-sepleri görkezildi. Şeýle hem bu ýerde hytaý operasyndan parçalar ýerine ýetirildi.
Tanyşlygyň ahyrynda Oguljahan Atabaýewa merkeze mundan beýläk-de netijeli işlemegi arzuw edip, bu ýerde dostlugyň nyşany hökmünde ýadygärlik ýazgy galdyrdy.
