Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň ýolbaşçylygyndaky türkmen wekiliýeti Hytaýa saparynyň çäklerinde «Gugun» taryhy köşkler toplumyna baryp gördi.
Toplum Pekiniň merkezinde ýerleşip, 500 ýylyň dowamynda Min we Sin nesilşalyklarynyň imperatorlarynyň ýaşan köşgi bolupdyr. Häzirki wagtda bu köşkler toplumy muzeý hökmünde hereket edýär. Köşgüň gurluşygy 1406-njy ýylda başlanyp, 15 ýyl dowam edipdir. Onuň gurluşygynda 1 milliona golaý işçi, 100 müňe golaý beýleki hünärmenler zähmet çekipdir. Taryhy muzeý 72 gektar meýdany tutup, onuň çäginde 980-den gowrak bina we 8 müň 700-den hem köp otag bar. Toplumyň daşy suwly garym we beýikligi 10 metr diwar bilen gurşalandyr. Sary reňk hytaý imperatorlarynyň resmi reňki bolandygy üçin toplumdaky binalaryň aglabasynyň üçegi bu reňk bilen boýalypdyr. Şeýle hem toplumyň çäginde imperatoryň we onuň maşgalasynyň dynç alan, gezelenç eden seýilgähi ýerleşýär. Ol 12 müň inedördül metr meýdany tutup, emeli baýyrlar, suw howdanlary, ýodajyklar bilen sazlaşykly utgaşýan adaty hytaý äheňinde döredilipdir. Irki döwürlerde bu ýerde dürli baýramçylyk çäreleri geçirilipdir.
Ýurdumyzyň wekiliýetiniň agzalary «Gugun» taryhy köşkler toplumynda ýadygärlik surata düşdüler.
