Microsoft ilkinji gezek özüniň emeli aň modellerini hödürledi. Mundan öň kompaniýa, esasan, OpenAI-iň çözgütlerini ulanyp, olary Azure infrastrukturasyna we Copilot önümlerine goşýardy. Indi bolsa onuň öz ulgamlary – MAI-Voice-1 we MAI-1-preview bar.
MAI-Voice-1 – bu sözleýşi emele getirýän model. Ol eýýäm audio habar we howa maglumatlaryny döredýän Copilot Daily programmalarynda we Podcasts-da ulanylýar. Onuň mümkinçilikleri bilen tanyşmak üçin Copilot Labs interfeýsi döredildi. Copilot Audio Expressions funksiýasynyň kömegi bilen ulanyjylar tekst goýup, sesi we stili saýlap, soňra taýýar audio faýly ýükläp alyp biler. Kompaniýanyň maglumatlaryna görä, model ýokary tizlikde işleýär: bir minutlyk sözleýiş sekuntdan az wagtyň içinde döredilýär.
Ikinji model, MAI-1-preview – LMArena platformasynda köpçülikleýin beta-wersiýa görnüşinde elýeterli. Bu Microsoft-yň doly derejede öz güýji bilen döreden ilkinji modelidir. Ol 15 000 Nvidia H100 tizleşdirijisinde MoE arhitekturasy boýunça okadyldy. Korporasiýanyň maglumatlaryna görä, model görkezmeleri ýerine ýetirip, ulanyjylaryň soraglaryna jogap berýär. Ýakyn hepde ony synag funksiýalary üçin Copilot-a goşmak meýilleşdirilýär.
Kompaniýa MAI-1-preview-iň OpenAI-iň modelleriniň ornuny tutmajakdygyny belleýär. Geljekde Microsoft öz modellerini hyzmatdaşlyk çözgütleri we açyk başlangyç kodly jemgyýetçilik taslamalary bilen utgaşdyrmak isleýär. Model synag edijileriň çäkli topary üçin API arkaly hem elýeterlidir.
