Azerbaýjan, Özbegistan we Türkmenistan optiki-paýlaýyş merkezleriniň ulgamyny döretmegi hem-de durnukly söwda-logistika zynjyrlaryny ösdürmegi meýilleşdirýärler.
ORIENT agentliginiň Report neşirine salgylanyp habar bermegine görä, bu barada Özbegistanyň maýa goýumlar, senagat we söwda ministri Laziz Kudratow “Türkmenistan-Azerbaýjan-Özbegistan” üçtaraplaýyn sammitiniň çäginde “Özbegistan-24” teleýaýlymyna beren söhbetdeşliginde habar berdi.
“Soňky ýyllarda Özbegistanyň hem Türkmenistan, hem-de Azerbaýjan bilen ykdysady hyzmatdaşlyk gatnaşyklary ýokary depginde ösdürilýär. Soňky ýyllarda iki döwlet bilen söwda dolanyşygymyz iki esse gowrak artdy. Has wajyp tarapy bolsa, söwda dolanyşygymyzyň düzüminiň takmynan 40%-ini ýokary goşmaça gymmatlykly, senagat harytlary düzýär. Bu bolsa ykdysady gatnaşyklaryň täze bir derejesine çykýandygymyzy görkezýär” - diýip, ol belledi.
Onuň sözlerine görä, mejlisde ykdysady hyzmatdaşlygy has-da çuňlaşdyrmaga ýardam berjek möhüm çözgütler kabul edildi. Ilkinji nobatda gürrüň söwda hyzmatdaşlygy we senagat kooperasiýasynyň çuňlaşdyrylmagy barada barýar. “Üç ýurduň söwda ministrlikleri durnukly söwda-logistika zynjyrlaryny ösdürmäge gönükdirilen toplumlaýyn hereket meýilnamasyny taýýarlamak üçin iş alyp bararlar” - diýip, ministr aýtdy.
Ol meýilnamanyň optiki-paýlaýyş merkezleriniň ulgamyny döretmegi we önümleriň üç ýurduň bazarlaryna ýeňilleşdirilen görnüşde çykmagyny öz içine alýandygyny düşündirdi. Şonuň bilen bir hatarda, taraplar fitosanitar we karantin talaplarynyň utgaşdyrylmagyny aýratyn seljerip görerler.
“Harytlaryň sanly belliklenmegi boýunça-da işläris, bu bolsa aragatnaşyksyz we gaty çalt söwda amallaryny üç ýurdumyzda ýerine ýetirmäge mümkinçilik berer. Elbetde, elektron söwdany hem ösdüreris” - diýip, Kudratow nygtady.
Onuň pikiriçe, elektron söwda formatlary öndürijileriň we üpjün edijileriň önümlerini göni sebitdäki sarp edijiler bilen baglanyşmagyna mümkinçilik berýän gurallaryny ornaşdyrmaga ýardam etmelidir.
“Şeýle-de, biz sebitleriň arasyndaky göni hyzmatdaşlygy ösdürmegi dowam etdireris. Sebitara hyzmatdaşlygy telekeçileriň biri-biri bilen gönüden-göni arabaglanyşmagyna mümkinçilik berer. Şeýle gatnaşyklaryň iň gysga wagtda anyk netijeleri berjekdigine ynanýarys” - diýip, ol sözlerini jemledi.
