Kofe öndürýän ýurtlar kofe dänelerini hem içerki bazar, hem eksport üçin ösdürip ýetişdirýärler we gaýtadan işleýärler. Dünýäde kofeniň esasy görnüşleri - arabika we robusta bolup, olaryň ösdürilip ýetişdiriliş şertleri düýpgöter tapawutlanýar.
Arabika aýratyn howa we beýik dag şertlerini talap edýär, ol deňiz derejesinden 600-2000 metr we ondanam ýokary bolmaly. Bu gymmat we zähmeti köp talap edýän görnüşdir: ösümlikler kesellegiç bolýarlar, idegi, dökünleri talap edýär we käbir sebitlerde emeli suwaryş ulgamlary zerur bolup durýar.
Robusta ynjyk däl. Oňa diňe ýylylyk we çyglylyk bolsa bolany, şonuň üçin ol tropiki ýerlerde ösýär, yssa we güýçli ýagyşlara çydamly, seýrek keselleýär we hemişe ideg edip durmak hökman däl.
ABŞ-nyň Oba hojalyk ministrliginiň habaryna görä, Braziliýa dünýäde iň uly kofe öndürijidir. Ýurt 2025-nji ýylda 60 kilogramlykdan 64,7 million halta kofe ýygnap biler, bu bolsa dünýädäki umumy mukdaryň üçden birine golaýdyr.
Ikinji orunda Wýetnam durýar. Halkara kofe guramasynyň (ICO) hasabatyna görä, onuň dünýä bazaryndaky paýy takmynan 20% (29 million halta). Esasy önümçilik sebitleri Merkezi daglyklar - Daklak, Lamdong we Zýalaý. Robusta Wýetnamda ýygnalýan hasylyň 95%-den gowragyny düzýär.
Kolumbiýa dünýäde arabikany öndürmek boýunça öňdebaryjy ýurt hasaplanýar. Bu ýerde her ýyl 11-14 million halta kofe ösdürilip ýetişdirilýär. Kofe ekinzarlyklarynyň köpüsi Andlarda, "Kofe ekinleri landşaftynda" ýerleşýär. Ajaýyp arabikanyň görnüşlerini gorap saklamak üçin robustanyň ýurda getirilmegi resmi taýdan gadagan edilýär.
