Google kompaniýasy Gemini emeli aňynyň daşky gurşawa ýetirýän täsiri barada öz barlagyny çap etdi. Kompaniýa netijeliligiň ýokarlanmagy bilen häzirki modeliň ortaça 0,24 watt sagat elektrik energiýasyny (telewizoryň dokuz sekuntlap işlemegine deň) we bir tekst soragy üçin takmynan 0,26 millilitr suw (bäş damja) sarp edýändigini tassyklaýar. Şeýle-de bolsa, alymlaryň bir topary bu sanlaryň jemgyýetçiligi ýalňyş pikire iterýändigini aýtdylar.
Google-yň habar bermegine görä, gözlegiň ortaça netijesi, takmynan, 0,03 gram kömürturşy gazynyň zyňyndysyna deňdir. Hasabatda kompaniýanyň howanyň maksatlaryndan "periferiýa" ýa-da kompaniýanyň gönüden-göni gözegçiliginiň daşyndaky zyňyndylaryň käbir kategoriýalaryny aýyrýandygy bellenilýär.
Alymlaryň pikirine görä, kompaniýanyň bu usulyýeti ýagdaýy doly göz öňüne getirmäge mümkinçilik bermeýär.
Amsterdam garaşsyz uniwersitetiniň Daşky gurşawy öwreniş institutynyň aspiranty Aleks de Wrik-Gao: "Siz, esasan, aýsbergiň diňe depesini görýärsiňiz" – diýip, teswir berdi. Tankytçylaryň pikirine görä, Google elektrik energiýasyny öndürmek üçin gapdaldan sarp edilýän suwy däl-de, diňe maglumat merkezlerini sowatmak üçin ulanylýan suwy hasaplaýar.
Kompaniýa hasabaty resenzirlemek üçin tabşyrmagy meýilleşdirýändigini we aç-açanlygy ýokarlandyrmagyň üstünde işlejekdigini aýtdy. Onuň berýän maglumatlaryna görä, geçen ýylda Gemini-niň energiýa netijeliligi 33 esse, bir soragyň uglerod yzy 44 esse azaldy.
Şeýle-de bolsa, barlagçylar netijeliligiň ýokarlanandygyna garamazdan, AI çeşmeleriniň umumy sarp edilişiniň hem ýokarlanýandygyny, bu hapalanmagyň ýokarlanmagyna sebäp bolup biljekdigini duýdurýarlar.
Google neşir edilmezinden ozal diňe OpenAI-yň baş direktory Sem Altmanyň AI-niň köpçülikleýin ulanylmagynyň daşky gurşawa ýetirýän täsirine baha berendigini bellemelidiris: iýun aýynda ChatGPT-iň ortaça soragynyň “takmynan 0,34 watt-sagat” sarp edýändigini ýazdy.
