Dünýäde 2,4 milliarddan gowrak adam iş ýerinde adatdan daşary yssy howanyň täsirine sezewar bolýar. Bu hem zähmet şikesleriniň, keselleriň sanynyň artmagyna we ýaşaýyş hiliniň ýaramazlaşmagyna getirýär diýip, Bütindünýä saglygy goraýyş guramasy (BSGG) nygtaýar.
BSGG-niň we BMG-niň Bütindünýä meteorologiýa guramasynyň bilelikdäki hasabatynda 2024-nji ýylyň gözegçiligiň tutuş taryhynda iň yssy ýyl bolandygy bellenilýär. 40 gradusdan we hatda 50 gradusdan ýokary gündizki temperatura adaty hadysa öwrülip barýar.
Bütindünýä meteorologiýa guramasynyň baş sekretarynyň orunbasary Ko Barrett işçileri aşa yssy howadan goramagyň diňe bir saglyk üçin däl, eýsem ykdysady nukdaýnazardan hem möhümdigini belledi.
Guramanyň we BSGG-niň maglumatlaryna görä, 20-den ýokary her bir gradusda zähmet öndürijiligi 2-3% peselýär, işçileriň saglygy üçin howp bolsa ýokarlanýar. Yssy howanyň netijesi Günüň urmagy, suwsuzlyk, böwregiň işiniň bozulmagy we newrologiki bozulmalar bolup biler. Yssy bilen baglanyşykly zähmet şikesleriniň sany ýylda 22,85 mln ýagdaýdan geçýär.
BSGG hökümetlere, iş bilen üpjün edijilere we saglygy goraýyş edaralaryna ýokary temperaturada zähmet howpsuzlygy boýunça syýasaty işläp taýýarlamagy, ilatyň gowşak toparlaryna üns bermegi, lukmanlara, halasgärlere we ýolbaşçylara Gün urmasynyň alamatlaryny bilmegi, şeýle-de bu ugurda gözlegleri we töwekgelçiliklere baha bermegi goldamagy maslahat berýär.
