Türkmenistanda ozon gatlagyny goramagyň Halkara güni mynasybetli mekdep okuwçylarynyň arasynda “Ozon we klimat” atly ylmy-döredijilik bäsleşigi yglan edildi. Bäsleşigi “Ýaş tebigatçy” jemgyýetçilik guramasy BMG-niň Senagat Ösüşi boýunça guramasy (UNIDO) we BMG-niň Ösüş Maksatnamasy (BMGÖM) bilen bilelikde guraýar.
Aşgabat şäheriniň umumybilim berýän orta mekdepleriniň 7-12-nji synp okuwçylarynyň arasynda geçirilýän bäsleşik ozon gatlagyny goramak baradaky bilimleri kämilleşdirmegi, ekologiýa medeniýetini kemala getirmegi, ylmy-barlag we döredijilik ukyplaryny ösdürmegi maksat edinýär.
Bäsleşigiň şertine laýyklykda, oňa gatnaşyjylar «Ozon gatlagyny gorap saklamak we howanyň üýtgemeginiň täsirlerini azaltmak üçin adamlar näme edip biler?» diýen tema boýunça görkezme esbap (maket) we taslama işini taýýarlamaly. Görkezme esbap klimaty we ozon gatlagyny goramak babatda öňe sürülýän çäreleri aýdyň şöhlelendirmeli. Taslama işiniň göwrümi bolsa degişlilikde 5-10 sahypalyk tekstden ybarat bolmaly.
Bäsleşige hödürlenilýän işler 2025-nji ýylyň 26-njy sentýabryna çenli “Ýaş tebigatçy” jemgyýetçilik guramasyna tabşyrylmaly.
Işlere ýörite düzülen topar tarapyndan kesgitlenen ölçeglere laýyklykda baha berler.
Gatnaşyjylaryň ählisine guramaçylar tarapyndan sertifikatlar, ýeňijilere höweslendiriji ýadygärlik sowgatlar gowşurylar.
Salgysy: Aşgabat ş., Köpetdag etrabynyň Azady köçesiniň 61-nji jaýy
Telefonlar:
94-03-26(19),
+99364 26-84-32.
