Türkiýe Türkmenistanyň raýatlary üçin talyp wizasy bilen baglanyşykly ýüz tutmak tertibine üýtgetmeleri girizdi. Bu barada Türkiýäniň Aşgabatdaky Gateway wizalar merkezi mälim etdi. Üýtgetmler 2025-nji ýylyň 20-nji awgustyndan güýje girýär.
Täze düzgünlere laýyklykda talyp wizasyny almak isleýän türkmen raýatlary indi öňünden ýazylmazdan ýüz tutup bilerler. Esasy şert — okuw mekdebine kabul edilendigini tassyklaýan resminamanyň ýa-da talyp şahadatnamasynyň görkezilmegidir.
Gateway wizalar merkezi bu kararyň Türkmenistandan talyp wizasy üçin ýüz tutýanlaryň sanynyň ep-esli artmagy bilen baglylykda kabul edilendigini belleýär. Täze tertip resminamalaryň resmileşdirilmegini çaltlaşdyrmak we mümkin bolan kynçylyklaryň öňüni almaklyga gönükdirilendir.
Ähli zerur resminamalary bolan Türkmenistanyň raýatlary wizalar merkezine öňünden ýazylmazdan ýüz tutup bilerler. Bu bolsa Türkiýede bilim almagy meýilleşdirýän türkmen talyplary üçin wiza almak tertibini has-da ýeňilleşdirýär.
Has giňişleýin maglumatlary almak üçin ýüz tutujylar helpline.turkmenistan@gateway.com.tr elektron poçta salgysy arkaly ýa-da merkeziň resmi sosial ulgamdaky sahypalary arkaly habarlaşyp bilerler.
