Archer Aviation kompaniýasy Midnight uçarynyň rekord synag uçuşyny amala aşyrdy. Enjam howada 31 minut bolup, borty uçarmanly 88 kilometr töweregi ýol geçdi. Bu üstünlik howa taksisiniň täjirçilik hyzmatlaryny ýola goýmakda möhüm ädim boldy diýip, Interesting Engineering ýazýar.
Synag Salinasda (Kaliforniýa) geçirildi. Bu gezek işläp düzüjiler adaty uçuş we gonuş režimini (CTOL) barlady. Midnight dik uçuşy (VTOL) hem goldaýar. Onuň iň ýokary tizligi 203 km/sag, aýratyn režimlerde 241 km/sag barabar. Bu uçuş enjamyň ygtybarlylygyny, energiýa netijeliligini we ses derejesiniň pesdigini tassyklady.
Çärä United Airlines-iň maliýe müdiri Maýk Leskinen gatnaşdy. Awiakompaniýa Archer-iň strategiki hyzmatdaşy bolup, elektrik awiasiýanyň ösdürilmegine işjeň maýa goýýar. Leskinen Midnight-yň sessizliginiň we netijeliliginiň howa taksisini şäher şertlerine ornaşdyrmak üçin laýyk gelýändigini belledi.
Archer indi Midnight-y ABŞ-nyň Federal raýat awiasiýasy edarasynda (FAA) tassyklamaga taýýarlanýar. Dört synagdan geçiriji uçarman ygtyýarnama almak üçin yzygiderli maglumat ýygnaýar. Kompaniýa Los-Anjelesde geçiriljek Olimpiada-2028-de howa taksileri bilen üpjün ediji bolmagy meýilleşdirýär.
Rekord uçuş baradaky habardan soň Archer-iň paýnamalary 7% ýokarlandy.
Midnight 100 km çenli ugurlarda dört ýolagçyny gatnatmaga niýetlenendir we 10-15 minutda zarýad alýar. Ilkinji täjirçilik gatnawlarynyň 2026-2027-nji ýyllarda bolmagyna garaşylýar, ileri tutulýan bazar bolsa Birleşen Arap Emirlikleri bolar. Bu ýerde eVTOL üçin infrastruktura işjeň ösdürilýär.
