“Týangun” stansiýasyndaky hytaý astronawtlary ilkinji emeli aň kömekçisini aldylar. Ýerli açyk modeliň esasynda döredilen “Ukun” atly ulgam täze skafandrlar, miweler we beýleki ätiýaçlyklar bilen “Týançžou-9” ýük gämisi arkaly stansiýa eltildi.
China Daily neşiri “Ukun” adynyň “Günbatara syýahat” romanynyň gahrymany – Maýmynlaryň şasy Sun Ukunyň şanyna saýlanandygyny belleýär.
Emeli aň kosmos üçin uýgunlaşdyrylan dil modeli we bilimler bilen üpjün edildi. Ol professional ýumuşlaryň giň toplumyny ýerine ýetirip bilýär. “Şençžou-XX” gämisiniň ekipažy eýýäm açyk kosmosa çykmaga taýýarlykda ulgamy synagdan geçirdi. Missiýanyň komandiri Çen Dun we astronawt Wan Sze “Ukundan” iş meýilnamasyny sorady we ýumuşlary ýerine ýetirmek üçin peýdaly bolan jikme-jik görkezmeleri aldy.
Astronawtlary taýýarlamagyň we öwrenmegiň hytaý merkeziniň işgäri Szou Penfeý “Ukunyň” orbitada işleýän ilkinji uly EA modeli bolandygyny belledi. Onuň aýtmagyna görä, ulgam eýýäm bir aý bäri durnukly işleýär we ekipaždan oňyn synlary aldy. Ol ýerüsti we bort modulyny birleşdirýär, bu hem maglumatlary seljermäge we möhüm meseleleri gönüden-göni stansiýada çözmäge mümkinçilik berýär.
EA-nyň kosmos wersiýasy täze ýumuşlara derrew uýgunlaşmaga we öz mümkinçiliklerini giňeltmäge ukyplydyr. Ol missiýany meýilnamalaşdyrmaga, maglumatlary gaýtadan işlemäge, çaklamalary öňe sürmäge kömek edip, ekipažyň psihologik ýagdaýyny goldaýar we stansiýa bilen Ýeriň arasyndaky gatnaşygy ýeňilleşdirýär.
