Harbiniň inženerlik uniwersitetiniň (Hytaý) ylmy gözlegçileri ummanyň energiýasynyň hasabyna hereket edýän ýumşak robot balygy döretdi. Ol umman ýaşaýjylaryna zyýan ýetirmezden onuň çuňluklaryndaky ýaşaýşy öwrenmek üçin niýetlenýär.
Robotyň uzynlygy 32 sm töweregi bolup, agramy 670 g barabar. Alymlar adaty suwasty enjamlardaky ýaly agyr hereketlendirijileriň deregine täze elektrogidrawlik ulgamy ulandy. Silikon korpusynyň gyralarynda deňiz suwunyň ionlaryny ulanyp, elektrik meýdanyny döredýän çeýe konstruksiýa ýerleşýär. Ol korpusyň içindäki suwuklygy hereket etmäge mejbur edýär, bu hem roboty herekete getirip, hakyky balygyň ýüzüşini ýasaýar.
Şeýle konstruksiýa robota çuňluklarda ýokary basyşa we adatdan daşary şertlere çydamaga mümkinçilik berýär.
Synaglaryň dowamynda robot 4 müň metre çümdi. Barlaghanada ol 10 müň metr çuňluga laýyk gelýän basyşa we 2 °C çenli temperatura çydady. Deňeşdirmek üçin, ummanyň iň çuň ýeri – Mariana oýlugyndaky Çellenjer çuňlugy 10 935 metrde ýerleşýär.
Kamera we optiki datçikler bilen enjamlaşdyrylan robot balyk ozal elýeterli bolmadyk çuňluklary öwrenmäge mümkinçilik berer diýip, alymlar belledi.
