Prezident Serdar Berdimuhamedow Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde dutarçy bagşy-sazandalaryň arasynda geçirilýän «Çalsana, bagşy!» bäsleşiginiň jemleýji tapgyryna gatnaşyjylary gutlady.
Döwlet Baştutany «Çalsana, bagşy!» bäsleşiginiň geljekde aýdym-saz sungatyny has-da ösdürmäge ukyply nesilleri ýüze çykarmakda, olary höweslendirmekde özboluşly ähmiýete eýedigini belledi.
"Türkmen halky ençeme asyrlaryň dowamynda aýdym-sazy özüniň ruhy syrdaşyna öwrüp geldi. Dutardyr gyjagyň sazlaşykly owazyndan dörän şirin aýdym-sazlar nesilleri watançylyk ruhunda terbiýelemekde, il içinde tutulýan toýlaryň şatlyk-şowhunyny artdyrmakda örän ähmiýetli bolupdyr. Hut şoňa görä-de, ata-babalarymyz aýdym-sazyň ynsan kalbyna täsir edýän joşgunly güýje eýedigine ynanypdyrlar, bagşyçylyk sungatyny toýlarynyň bezegine öwrüpdirler. Dutarda ýaňlanýan mukamlar halkyň kalbyna ganat bekledipdir, Watan, il-gün üçin beýik işlere ruhlandyrypdyr" diýip. Serdar Berdimuhamedow belleýär.
Döwlet Baştutany gutlagynda Kel bagşy, Hally bagşy, Muhy bagşy, Ablyesen bagşy, Gurban bagşy, Garly bagşy, Pälwan bagşy, Palta bagşy, Bazar bagşy, Hydyr bagşy, Girman bagşy, Oraz salyr, Nazar baga, Nursähet Halsähet, Ýazmuhammet Köse, Hanmämmet gyjakçy, Öre şyh, Baky Maşakow, Şamyrat Gurbannepesow, Juma Wellekow, Gurt Ýakubow, Annageldi Jülgäýew, Saryhan Sapaýew ýaly meşhur ussatlardan miras galan aýdym-sazlaryň ýaş bagşy-sazandalar üçin nusgalyk mekdepdigini belläp geçýär.
