Lukmanlar ençeme aýlap emeli aň tehnologiýalary ulanylandan soň düwnük keselini özbaşdak anyklamak başarnygyny ýitirýär. The Lancet iňlis žurnalynda neşir edilen ylmy gözlegde alymlar şeýle netijä geldi.
Ylmy gözleg 2021-nji ýylyň ahyrynda – 2022-nji ýylyň başynda Polşada dört sany endoskopiýa merkezinde geçirildi. Bu ýerde polipleri ýüze çykarmak üçin EA ulanyldy. Alymlar EA ornaşdyrylmazdan üç aý öň we ornaşdyrylandan üç aý soň kolonoskopiýa maglumatlaryny seljermegiň hilini deňeşdirdi. Netijeler maşyn bilimi ulanylyp başlanandan soň, lukmanlaryň maglumatlary özbaşdak seljermek netijeliliginiň 6% peselendigini görkezdi.
“Emeli aňyň yzygiderli ulanylmagy adaty kolonoskopiýada lukmanlaryň emeli aňa ýüzlenmezden adenomalary kynlyk bilen tapmagyna getirer, bu bolsa tehnologiýanyň lukmanlaryň işine ýaramaz täsir edýändigini görkezýär” – diýip, ylmy gözlegiň awtorlary belledi.
Bloomberg agentliginiň maglumatlaryna görä, işe 19 tejribeli lukman gatnaşdy, olaryň her biri azyndan 2000 barlag geçirdi. Emeli aňa öwrenişilenden soň lukmanlaryň ünslüligi we özbaşdak karara gelmekde jogapkärligi peselýär. Alymlar tehnologiýanyň giňden ulanylmagy bilen başarnyklaryň ýitmek prosesiniň güýçlenjekdigini duýdurýar.
ABŞ-nyň Milli saglygy goraýyş instituty EA-nyň giňden ýaýramagynyň dürli ugurlarda hünär başarnyklaryny peseldip biljekdigini duýdurdy. Tehnologiýanyň ýygy-ýygydan ulanylmagy kognitiw funksiýalary gowşadyp biler, çünki adam maglumatlary seljermekde we saklamakda öz ukybyna öňküsinden az bil baglaýar.
