13-nji awgustda YouTube ABŞ-da ulanyjynyň ýaşyny barlamak boýunça täze ulgamyny synagdan geçirip başlady. Tehnologiýa görýän wideolarynyň häsiýetine baglylykda uly ýaşly we kämillik ýaşyna ýetmedik tomaşaçylary tapawutlandyrmak üçin emeli aňdan peýdalanar.
Synag ilkibaşda platformanyň amerikaly tomaşaçylarynyň uly bolmadyk bölegini öz içine alar. Netije üstünlikli bolsa, tehnologiýa beýleki ýurtlara-da giňeldilip bilner. Ulgam diňe öz hasaplaryna giren ulanyjylar üçin işleýär we hasaba alnanda görkezilen doglan senesine garamazdan ýaşyny barlaýar.
AI ulanyjynyň 18 ýaşdan kiçidigini kesgitlese, onda YouTube platformada eýýäm bar bolan adaty çäklendirmeleri we süzgüçleri: arakesme etmegiň zerurdygy barada ýatlatmalary, gizlinlik baradaky duýduryşlary we hödürlenýän wideolara çäklendirmeleri ulanar. Mundan başga-da, 18 ýaşdan kiçi ulanyjylara şahsylaşdyrylan mahabat görkezilmez.
YouTube-yň wideolary hasaba girmezden hem elýeterli bolup biler, ýöne käbir materiallar ýaş tassyklanýança awtomatiki usulda petiklener.
ABŞ-nyň Ýokary kazyýeti Tehas ştatynyň kämillik ýaşyna ýetmedikleriň käbir kategoriýadaky wideolary görmegini gadagan edýän kanunyny kabul edeninden soň, onlaýn platformalara syýasy basyş ýokarlandy. Käbir hyzmatlar ýaş barlagyny güýçlendirdi, ýöne käbir bilermenler jogapkärçiligiň ilkinji nobatda Apple-iň we Google-yň mobil programma dükanlarynyň üstüne düşýändigini belleýärler, ýöne kompaniýalaryň özi munuň bilen ylalaşmaýar.
Electronic Frontier Foundation we Center for Democracy & Technology ýaly sanly hukuklary goraýan guramalar şeýle ýaş barlagynyň ABŞ-nyň konstitusiýasynyň Birinji üýtgetmesi bilen goralýan şahsy durmuşyň eldegrilmesizligi we söz azatlygy hukuklaryny bozup biljekdigi barada alada bildirýär.
