13-nji awgustda Türkmenabat şäherindäki «Türkmeniň ak öýi» binasynyň öňündäki meýdançada «Ýaňlan, Diýarym! ― 2025» telebäsleşiginiň Lebap welaýaty boýunça tapgyrynyň ýeňijisini saýlamak boýunça bäsleşik geçirildi. Bäsleşige 10 aýdymçy gatnaşdy.
Bäsleşikli ýollary geçen ýaş zehinler welaýat tapgyrynyň ýeňijisi bolmak üçin yhlas-başarnyklaryny gaýgyrmadylar. Olar öz çykyşlarynda halkymyzyň baý aýdym-saz hazynasyny döwrebap sahna öwüşginleri bilen utgaşdyryp, türkmen sungatynyň beýik ýörelgelerini dowam etdirdiler. Eminler ýaşlaryň ýerine ýetirijilik ussatlygyna, sahnada özüni alyp barşyna, aýdymlaryň sözüniň dogry we täsirli aýdylyşyna aýratyn üns berdiler. Aýdymçylar watansöýüjilik, halallyk, ynsanperwerlik, hoşniýetlilik ýaly ýörelgeleri wasp edýän aýdymlary ýerine ýetirdiler. Käbir çykyşlarda dessanlarymyzdan, nusgawy we döwürdeş şahyrlarymyzyň döredijiliginden, şeýle hem halk arasynda meşhur bolan aýdymlar ýaňlandy.
Eminleriň gelen netijesine laýyklykda, Darganata etrabynyň medeniýet merkeziniň çeper höwesjeňi Durdymyrat Abdullaýew we Saýat etrabynyň medeniýet merkeziniň çeper höwesjeňi Resul Guwanjow ýeňiji diýlip yglan edildi. Netijede, olar bäsleşigiň döwlet tapgyrynda çykyş etmäge hukuk gazandylar. Ýeňijilere hem-de beýleki gatnaşanlara dabaraly ýagdaýda gül desseleri, gymmat bahaly sowgatlar gowşuryldy.
