12-nji awgustda Aşgabatda Jemgyýetçilik saglygy we iýmit merkezinde Türkmenistanda «Bitewi saglyk» çemeleşmesini durmuşa geçirmek meseleleri boýunça Milli pudagara utgaşdyryjy komitetiň üçünji maslahaty geçirildi.
Bu komitet bu ugurda utgaşdyrmak, aragatnaşyk gurmak we bilelikdäki çäreleri durmuşa geçirmek maksady bilen döredildi. Maslahatyň dowamynda Oba hojalyk ministrliginiň ýanyndaky Döwlet weterinariýa gullugynyň, Saglygy goraýyş we derman senagaty ministrliginiň hem-de Daşky gurşawy goramak ministrliginiň milli utgaşdyryjylarynyň hasabatlary diňlenildi.
Çärede oba hojalygynda mallaryň saglygyny goramak ugrunda gazanylan ösüşler, zoonoz keselleriniň öňüni almak boýunça üstünlikler, halkara standartlaryny ornaşdyrmak, hünärmenleri taýýarlamak hem-de pudagara hyzmatdaşlygy ösdürmek boýunça edilen işler beýan edildi.
Komitetiň maksatlarynyň we wezipeleriniň arasynda utgaşdyryş, aragatnaşyk we hyzmatdaşlyk mehanizmlerini döretmek, çäreleriň monitoringi we bahalandyrma ulgamyny ýola goýmak, «Bitewi saglyk» uguryndaky döwlet syýasatyny taýýarlamaga ýardam etmek, şeýle hem adamlaryň, haýwanlaryň we ekoulgamyň saglygyny goramak boýunça dürli töwekgelçiliklere taýýarlygy we meýilleşdirmegi göz öňünde tutmak bar.
